బాలీవుడ్ సీనియర్ నటుడు జితేంద్ర ,ఆయన కుమారుడు తుషార్ కపూర్ రియల్ ఎస్టేట్ రంగంలో సంచలనం సృష్టిస్తున్నారు. ముంబైలోని జుహు ప్రాంతంలో ఉన్న తమకు చెందిన విలువైన స్థలాన్ని వీరు ఇటీవల రూ. 559 కోట్లకు విక్రయించారు. ఈ భారీ డీల్తో చిత్ర పరిశ్రమలో మరోసారి కపూర్ కుటుంబం వార్తల్లో నిలిచింది. ఒక ప్రముఖ డెవలపర్ సంస్థ ఈ స్థలాన్ని కొనుగోలు చేసినట్లు తెలుస్తోంది. ముంబైలో పెరుగుతున్న స్థిరాస్తి ధరల నేపథ్యంలో ఈ విక్రయం అత్యంత భారీ డీల్స్లో ఒకటిగా నిలిచింది.
కేవలం ఈ ఒక్క డీల్ మాత్రమే కాకుండా, గత ఎనిమిది నెలల కాలంలో జితేంద్ర కుటుంబం వరుసగా రియల్ ఎస్టేట్ లావాదేవీలు నిర్వహిస్తోంది. వివిధ నివేదికల ప్రకారం, వీరు ఈ స్వల్ప కాలంలోనే మొత్తం రూ. 1,414 కోట్ల విలువైన ఆస్తుల విక్రయాలను పూర్తి చేశారు. తమ వద్ద ఉన్న పాత ఆస్తులను విక్రయించి, ఆ నిధులను ఇతర లాభదాయకమైన ప్రాజెక్టుల్లో లేదా వ్యాపారాల్లో పెట్టుబడి పెట్టడమే లక్ష్యంగా వీరు ఈ నిర్ణయాలు తీసుకుంటున్నట్లు సమాచారం.
సాధారణంగా బాలీవుడ్ ప్రముఖులు ఆస్తులను కొనుగోలు చేయడం చూస్తుంటాం, కానీ ఇంత పెద్ద మొత్తంలో ఆస్తులను విక్రయించడం విశేషం. జితేంద్రకు చెందిన ‘బాలాజీ టెలీఫిల్మ్స్’ ఇప్పటికే నిర్మాణ రంగంలో అగ్రగామిగా ఉండగా, ఇప్పుడు రియల్ ఎస్టేట్ ద్వారా వస్తున్న ఈ భారీ నిధులు వారి వ్యాపార సామ్రాజ్యాన్ని మరింత విస్తరించేందుకు దోహదపడతాయని విశ్లేషకులు భావిస్తున్నారు. ముంబై రియల్ ఎస్టేట్ మార్కెట్లో ఈ స్థాయిలో లావాదేవీలు జరగడం పట్ల ఇన్వెస్టర్లు సైతం ఆశ్చర్యం వ్యక్తం చేస్తున్నారు.
