అటు థియేట‌ర్‌, ఇటు ఓటీటీ – సినీ ప్రేక్ష‌కుల‌కు రెండు వైపుల నుంచీ వినోద‌మే. థియేట‌ర్లు తెర‌చుకోవం, క‌రోనా భ‌యాలు కాస్త కాస్త త‌గ్గ‌డంతో – ప్రేక్ష‌కులు మ‌ళ్లీ టికెట్ కౌంట‌ర్ల ముందు క్యూ క‌డుతున్నారు. `సిటీమార్‌` సినిమాకి వ‌చ్చిన స్పంద‌న – మిగిలిన నిర్మాత‌ల‌లో ఉత్సాహం నింపుతుండ‌డంతో ఇక మీద‌ట మ‌రిన్ని సినిమాలు విడుద‌ల‌కు రెడీ అవ్వ‌బోతున్నాయి. ఈ శుక్ర‌వారం అయితే, అటు ఓటీటీలోనూ, ఇటు వెండి తెర‌పైనా కొత్త సినిమాల జాత‌ర క‌నిపించ‌బోతోంది.
నితిన్ క‌థానాయ‌కుడిగా న‌టించిన `మాస్ట్రో` ఈ వార‌మే విడుద‌ల అవుతోంది. అయితే… ఓటీటీలో. డిస్నీ హాట్ స్టార్ ఈ సినిమా హ‌క్కుల్ని ద‌క్కించుకున్న సంగ‌తి తెలిసిందే. గత వారం ఓటీటీలో నాని `ట‌క్ జ‌గ‌దీష్‌`గా ద‌ర్శ‌న‌మిస్తే ఈసారి నితిన్ `మాస్ట్రో` వంతు వచ్చింది. బాలీవుడ్ `అంధాధూన్` చిత్రానికి ఇది రీమేక్‌. త‌మ‌న్నా, న‌భాన‌టేషాల గ్లామ‌ర్ ఈ సినిమాకి మ‌రింత ప్ల‌స్ కానుంది. ఇక అదే రోజున థియేట‌ర్ల‌లో `గ‌ల్లీ రౌడీ` సంద‌డి చేయ‌బోతున్నాడు. సందీప్ కిష‌న్ – జి.నాగేశ్వరరెడ్డి కాంబోలో రూపొందిన సినిమా ఇది. నాగేశ్వరరెడ్డి కామెడీ టైమింగ్ బాగుంటుంది. మంచి క‌థ ఎంచుకుంటే క‌చ్చితంగా హిట్ కొట్ట‌గ‌ల ద‌మ్ముంది. ప్ర‌చార చిత్రాలు బాగుండ‌డంతో – ఈ సినిమాపై అంద‌రి దృష్టీ ప‌డింది. ఇదే రోజున విజ‌య్ ఆంటోనీ `విజ‌య్ రాఘ‌వ‌న్‌`, హ‌ర్బ‌జ‌న్ సింగ్ తెరంగేట్రం చేసిన `ఫ్రెండ్ షిప్‌`, జెమ్‌, ప్లాన్ బి, హ‌నీ ట్రాప్ సినిమాలు థియేట‌ర్ల‌లోనే రాబోతున్నాయి.
