సాధారణంగా అయితే సంక్రాంతి సీజన్ తర్వాత వచ్చే ఫిబ్రవరి, మార్చి.. సినిమాలకి డెడ్ సీజన్ అంటారు. మార్చిలో పరీక్షలు, అంతకుముందు ప్రిపరేషన్ ద్రుష్టిలో పెట్టుకొని ఈ రెండు నెలల్లో పెద్ద, మీడియం సినిమాల విడుదలకు అంత ఆసక్తి చూపించరు నిర్మాతలు. అయితే ఇప్పుడు పరిస్థితులు మారాయి. ఈ ఏడాది ఫిబ్రవరిలో ఏకంగా పది ప్రమెసింగ్ సినిమాలు విడుదలకు రెడీ అవుతున్నాయి.
ఫిబ్రవరి3 తేదిన ఏకంగా ఆరు సినిమాలు ప్రేక్షకుల ముందుకు వస్తున్నాయి. ఇందులో సందీప్ కిషన్ ‘మైఖేల్’ పాన్ ఇండియా మూవీ గా వస్తోంది. ట్రైలర్ ఆసక్తి రేకెత్తించింది. విజయ్ సేతుపతితో పాటు భారీ తారాగణం వుంది. అలాగే బుట్టబొమ్మ (ఫిబ్రవరి4) , రైటర్ పద్మభూషణ్ లాంటి ప్రామెసింగ్ సినిమాలు కూడా వరుసలో వున్నాయి. కలర్ ఫోటోతో ఆకట్టుకున్న సుహాస్ రైటర్ కి కథానాయకుడు. సితార బ్యానర్ నుంచి వస్తోంది బుట్టబొమ్మ. ఇవి కాకుండా తుపాకుల గూడెం, వేయ్ దరువేయ్ అనే చిన్న సినిమాలతో పాటు ప్రేమదేశం రీరిలీజ్ అవుతుంది.
తర్వాత వారం కళ్యాణ్ రామ్ ‘అమిగోస్’ తో వస్తున్నాడు. బింబిసార విజయం తర్వాత కళ్యాణ్ రామ్ నుంచి వస్తున్న సినిమా ఇది. మైత్రీ మూవీ మేకర్స్ నిర్మాతలు కావడం మరో విశేషం. ఫిబ్రవరి 17 సమంత, గుణశేఖర్ ల డ్రీం ప్రాజెక్ట్ శాకుంతులం వస్తోంది. అదే రోజు ధనుష్ సార్ సినిమా కూడా వుంది. అదే రోజు విశ్వక్ సేన్ ‘ధమ్కి’ ఇవ్వడానికి రెడీగా వున్నాడు. వీటితో పాటు కిరణ్ అబ్బవరం ‘వినరో భాగ్యం’ కూడా 17నే డేట్ లాక్ చేసుకుంది. ఫిబ్రవరిలో నాలుగు ప్రామెసింగ్ సినిమాలు ఒకేడేట్ కి రావడం ఎప్పుడూ జరగలేదు. మొత్తానికి అన్ సీజన్ అనుకున్న ఫిబ్రవరి.. ఇప్పుడు తెలుగు సీజన్ కి హాట్ సీజన్ గా మారింది.
