తెలుగుదేశం పార్టీకి బయటి శత్రువుల కంటే లోపల ఉండి గోతులు తీసే వారి వల్లే ఎక్కువ నష్టం జరుగుతోందనేది జగమెరిగిన సత్యం. పార్టీ పదవుల కేటాయింపులో అగ్రనాయకత్వం అన్ని కోణాల్లో ఆలోచించి నిర్ణయం తీసుకుంటుంది. కానీ, ఆ పదవులు తమకు నచ్చని వారికి లేదా తమ ప్రత్యర్థులకు దక్కినప్పుడు, కొందరు నాయకులు తమ అనుచరులతో సోషల్ మీడియాలో నెగటివ్ ప్రచారాన్ని ప్రారంభిస్తున్నారు. ఇది వ్యక్తిగత విమర్శగా మొదలై, చివరకు పార్టీ అధిష్టానం నిర్ణయాలనే తప్పుబట్టే స్థాయికి వెళ్లడం విచారకరం.

జన్నత్ నియామకం – వాస్తవాలు ఏంటి?

గుంటూరు తెలుగు యువత అధ్యక్షుడిగా నియామకమైన జన్నత్ విషయంపై ఇదే ప్రచారం చేస్తున్నారు. ఆయనకు పార్టీ పట్ల ఉన్న నిబద్ధత గురించి స్థానిక నేతలకు పూర్తి అవగాహన ఉంది. గతంలో రాజకీయ కారణాలతో, కేసుల భయంతో ఆయన వైసీపీలోకి వెళ్లాల్సి వచ్చినా, అక్కడ ఇమడలేక ఎన్నికలకు ముందే బయటకు వచ్చి టీడీపీ విజయం కోసం పనిచేశారు. ఇది పార్టీ పెద్దల దృష్టిలో ఉన్న విషయమే. అయితే, ఈ వాస్తవాలను దాచిపెట్టి, కేవలం ఆయన వైసీపీ బ్యాక్‌గ్రౌండ్ నుంచి వచ్చారని ప్రచారం చేయడం వెనుక స్వపక్షంలోనే ఉన్న ప్రత్యర్థుల కుట్ర కనిపిస్తోంది.

సోషల్ మీడియా అతి – కార్యకర్తల బాధ్యతారాహిత్యం

పార్టీ అగ్రనేతలు చంద్రబాబు నాయుడు, లోకేశ్ వంటి వారు ఒక వ్యక్తికి బాధ్యత ఇస్తున్నారంటే, ఆ వ్యక్తి సామర్థ్యం , గతాన్ని పూర్తిగా పరిశీలిస్తారు. కానీ, క్షేత్రస్థాయిలో ఉన్న కొందరు సోషల్ మీడియా యాక్టివిస్టులు అతి ఉత్సాహం ప్రదర్శిస్తూ, పూర్తి సమాచారం లేకుండా పోస్టులు పెడుతున్నారు. తమ సొంత పార్టీ నాయకులపైనే నిందలు వేస్తూ ప్రత్యర్థి పార్టీలకు అస్త్రాలను అందిస్తున్నారు. ఈ తరహా ప్రచారాలు పార్టీ కేడర్‌లో అయోమయాన్ని సృష్టించడమే కాకుండా, కష్టపడి పని చేసే నాయకులను నిరుత్సాహపరుస్తాయి.

నాయకత్వంపై నమ్మకం అవసరం

రాజకీయాల్లో వ్యూహాత్మక నిర్ణయాలు ఉంటాయి. పార్టీని బలోపేతం చేసే క్రమంలో వివిధ వర్గాలకు ప్రాతినిధ్యం కల్పించాల్సి ఉంటుంది. అన్నీ తెలిసిన అగ్రనాయకత్వం నిర్ణయం తీసుకున్నాక, దానిని శిరసావహించాల్సింది పోయి రచ్చ చేయడం క్రమశిక్షణారాహిత్యమే అవుతుంది. ఇప్పటికైనా టీడీపీ కార్యకర్తలు, నాయకులు సోషల్ మీడియాలో చేసే ప్రచారాల విషయంలో విజ్ఞతతో వ్యవహరించాలి. లేనిపక్షంలో, అగ్రనేతల కష్టాన్ని ఇలాంటి చిన్నపాటి విభేదాలే నీరుగారుస్తాయి. దీన్ని అర్థం చేసుకోలేకపోతున్నారు.