వైఎస్సార్ కాంగ్రెస్ పార్టీ అంతర్గత వ్యవహారాల్లో గత కొన్నాళ్లుగా పెను మార్పులు కనిపిస్తున్నాయి. ముఖ్యమంత్రి జగన్ మోహన్ రెడ్డికి అత్యంత సన్నిహితుడిగా, పార్టీ శక్తి కేంద్రంగా వెలుగొందిన సజ్జల రామకృష్ణారెడ్డి ప్రాభవం క్రమంగా తగ్గుముఖం పడుతోందని, ఆ స్థానాన్ని చెవిరెడ్డి భాస్కర్ రెడ్డి భర్తీ చేస్తున్నారని తాడేపల్లి వర్గాల్లో జోరుగా చర్చ సాగుతోంది. కేవలం సలహాదారుడి పాత్రకే పరిమితం కాకుండా, పార్టీ క్షేత్రస్థాయి అవసరాలను తీర్చడంలో చెవిరెడ్డి ప్రదర్శిస్తున్న చొరవ ఆయనను ఇప్పుడు జగన్ వద్ద అత్యంత నమ్మకస్తుడిగా నిలబెట్టింది.

ఖర్చులో వెనుకాడని తత్వం.. పార్టీకి శ్రీరామరక్ష!

సజ్జల రామకృష్ణారెడ్డి పార్టీ వ్యూహకర్తగా పేరు తెచ్చుకున్నప్పటికీ, ఆర్థికపరమైన విషయాల్లో ఆయన అనుసరిస్తున్న తీరుపై కొంతకాలంగా అసంతృప్తి వ్యక్తమవుతోంది. ఇతర నేతలతో ఖర్చు పెట్టించడమే తప్ప, వ్యక్తిగతంగా పార్టీ కోసం వెచ్చించే విషయంలో ఆయన వెనుకబడి ఉన్నారనే వాదన వినిపిస్తోంది. దీనికి భిన్నంగా చెవిరెడ్డి భాస్కర్ రెడ్డి తన సంపాదనలో సింహభాగాన్ని పార్టీ కార్యక్రమాల కోసం, క్యాడర్ అభ్యున్నతి కోసం ఖర్చు చేయడానికి వెనుకాడకపోవడం ఇక్కడ సానుకూలాంశంగా మారింది. పార్టీ నుంచి ఆశించడం కంటే, పార్టీకి ఇవ్వడం అనే సూత్రాన్ని ఆయన పాటిస్తుండటం అధినేతను ఆకట్టుకుంది.

ఈవెంట్ మేనేజ్‌మెంట్‌లో దిట్ట.. జగన్ మనసెరిగిన నేత

ముఖ్యమంత్రి పర్యటనలు, సభలు, ఇతర పార్టీ కార్యక్రమాల నిర్వహణలో చెవిరెడ్డి చూపించే నైపుణ్యం అమోఘం. అత్యాధునిక సెట్టింగులు వేయడం నుంచి, జనసమీకరణ వరకు అన్నీ తానై చూసుకోవడంలో ఆయన సిద్ధహస్తుడు. ఈ క్రమంలో అయ్యే భారీ వ్యయాన్ని సైతం స్వయంగా భరిస్తూ, పార్టీ ఖజానాపై భారం పడకుండా జాగ్రత్త పడుతున్నారు. అంతేకాకుండా, పార్టీ పత్రిక సాక్షికి కోట్లాది రూపాయల ప్రకటనలు ఇస్తూ సంస్థను ఆదుకోవడంలోనూ ఆయన ముందంజలో ఉన్నారు. జగన్ మనసులో ఏముందో గ్రహించి, అడగకముందే పనులు పూర్తి చేయడంలో చెవిరెడ్డికి సాటిలేరనే గుర్తింపు వచ్చింది.

సజ్జలకు పెరుగుతున్న దూరం

పార్టీలో గతంలో అన్ని వ్యవహారాలు సజ్జల రామకృష్ణారెడ్డి సమక్షంలోనే జరిగేవి. కానీ ఇప్పుడు ప్రాధాన్యత క్రమంగా చెవిరెడ్డి వైపు మళ్లుతోంది. సజ్జల కేవలం మీడియా మేనేజ్‌మెంట్‌కు , కొన్ని అంశాలకే పరిమితమవుతుండగా, క్షేత్రస్థాయి యంత్రాంగంపై పట్టు మాత్రం చెవిరెడ్డి చేతుల్లోకి వెళ్తోంది. జగన్ కూడా ఆర్థికంగా భారం వేయకుండా పార్టీని నడిపించే నేతలకే పెద్దపీట వేస్తుండటంతో, రాబోయే రోజుల్లో తాడేపల్లి రాజకీయాల్లో చెవిరెడ్డి భాస్కర్ రెడ్డి పాత్ర మరింత కీలకం కానుందని గుసగుసలు వినిపిస్తున్నాయి.