ఏపీ భాజపా అధ్యక్షుడు కన్నా లక్ష్మీనారాయణ, ఉత్తరప్రదేశ్ ఎంపీ జీవీఎల్ నర్సింహారావుతో సహా కొంతమంది భాజపా నేతలు ఈసీని కలిసి ఫిర్యాదు చేశారు. అనంతరం కన్నా మాట్లాడుతూ… హాస్పిటళ్లలో పెద్ద ఎత్తున ధనం నిల్వలు ఉన్నాయని తాము ఫిర్యాదులు చేస్తే సోదాలు జరగడం లేదన్నారు. డబ్బు పంపిణీ యథేచ్ఛగా జరుగుతోందనీ ఫోన్లు చేసినా, ఫిర్యాదులు ఇచ్చినా ఎలక్షన్ కమిషన్ నుంచి స్పందన లేదని విమర్శించారు. ఎలక్షన్ కమిషన్ చర్యల్లేవని తాము మొత్తుకుంటా ఉంటే, ఈసీని పార్టీలకు అంటగట్టి విమర్శలు చేయడం చంద్రబాబు నాయుడి సహజ గుణమని విమర్శించారు కన్నా.
వాళ్ల అవసరాలకు అనుగుణంగా చంద్రబాబు డ్రామాలు వేస్తున్నారన్నారు. ఈ డ్రామాలకు తెర పడుతోందనీ, ప్రజలు తెర దించుతున్నారన్నారు. గోబెల్స్ ప్రచారం చేయడంలో నంబర్ వన్ తెలుగుదేశం పార్టీ అని విమర్శించారు కన్నా. తమ చిత్తశుద్ధిని, ప్రయత్నాన్ని నీరు గార్చడానికి చేసే ప్రయత్నాలను తీవ్రంగా ఖండిస్తున్నామన్నారు. తమకు ఎక్కడి నుంచీ ఆదేశాలూ సూచనలూ రాలేదనీ, తాము వచ్చి ఫిర్యాదు చేస్తున్నామన్నారు. ఎలక్షన్ కమిషన్ కి అత్యధిక సంఖ్యలో ఫిర్యాదులు ఇచ్చింది తమ పార్టీ అని కన్నా అన్నారు.
తమ ఫిర్యాదులను పట్టించుకోలేదని అంటున్నారుగానీ, డీజీపీ వెహికల్ ని తనిఖీ చేశారు కదా అని విలేకరి అడిగితే… అదంతా డ్రామా అని కొట్టిపారేశారు కన్నా. ముఖ్యమంత్రి చంద్రబాబు ఈసీకి ఫిర్యాదు నేపథ్యంలోనే ఢిల్లీ నుంచి మీకు సంకేతాలు వచ్చాయా, అందుకే వచ్చారా అని విలేకరులు అడిగితే కన్నా తీవ్రంగా స్పందించారు. ఎవరో చెబితే రాలేదనీ, అలా అన్నవాడు బుద్ధిలేనివాడనీ, తాము స్వయంగా నిర్ణయం తీసుకుని వచ్చామని చెప్పారు. కన్నాతో పాటు ఇతర భాజపా నేతల కామెంట్స్ పై.. నో కామెంట్స్.
