ప‌వ‌న్ క‌ల్యాణ్ సినిమాల‌పై సీరియ‌స్‌గానే దృష్టి పెట్టాడు. కానీ లుక్‌ని మాత్రం అశ్రద్ధ చేస్తున్నాడేమో అనిపిస్తోంది. జ‌న‌తా క‌ర్వ్యూపై స్పందిస్తూ ప‌వ‌న్ ఓ వీడియో వ‌దిలాడు. అందులో ప‌వ‌న్ లుక్ కాస్త అభిమానుల‌కు షాక్ ఇచ్చేట్టే క‌నిపిస్తోంది. ఇదో సీరియ‌స్ మేట‌ర్‌. లుక్కుల గురించి ఆలోచించ‌కూడ‌దు. కానీ.. అభిమానులు ప్ర‌తీదీ సినిమా కోణంలోనే చూస్తుంటారు. హీరో బ‌య‌ట ఎక్క‌డ క‌నిపించినా – సినిమాలోని లుక్కుతో బేరీజు వేసుకుంటారు. ఇప్పుడు ప‌వ‌న్ విష‌యంలోనూ అదే జరుగుతోంది. ఆ వీడియోలో ప‌వ‌న్ మీస‌క‌ట్టు, హెయిర్ స్టైల్ కాస్త మోటుగా ఉన్నాయి. క్రిష్ సినిమాలో ప‌వ‌న్ ఇదే లుక్కుతో క‌నిపించ‌బోతున్నాడు. తెర‌పై కూడా ప‌వ‌న్ ఇలానే ఉంటాడా? అనే సందేహాలు, భ‌యాలూ వ్య‌క్తం అవుతున్నాయిప్పుడు. క‌రోనా ఎఫెక్టుల వ‌ల్ల షూటింగులు ఆగిపోయాయి. మ‌ళ్లీ ఎప్పుడు మొద‌ల‌వుతాయో తెలీదు. అందుకే ప‌వ‌న్ త‌న లుక్‌పై అశ్రద్ధ చేసి ఉండొచ్చు. మరో విష‌యం ఏమిటంటే.. ప‌వ‌న్ కేవ‌లం సినీ న‌టుడే కాదు. సీరియ‌స్ రాజ‌కీయ నాయ‌కుడు కూడా. రాజకీయాల్లోకి వ‌చ్చాక లుక్కులు, డైటుల గురించి పెద్ద‌గా ప‌ట్టించుకోరు. కాక‌పోతే ప‌వ‌న్ ఇప్పుడు రెండు ప‌డ‌వ‌ల ప్ర‌యాణం చేస్తున్నాడు. లుక్‌ల‌పై కూడా శ్ర‌ద్ధ వ‌హిస్తే మంచిద‌న్న కామెంట్లు వినిపిస్తున్నాయి.
ప‌వ‌న్ గెట‌ప్‌.. ఫ్యాన్స్ షాక్
