బుజ్జి… బుజ్జి.. బుజ్జి.. నాలుగైదు రోజులుగా ప్రభాస్ ఫ్యాన్స్ క‌ల‌వ‌రిస్తున్న పేరు. ఈ బుజ్జి ఎవ‌రు? ఈ బుజ్జీకీ ‘కల్కి’ సినిమాకీ సంబంధం ఏమిటి? అనే ప్ర‌శ్న‌లు, సందేహాల‌తో సోష‌ల్ మీడియాని ఊపేశారు రెబ‌ల్ స్టార్ ఫ్యాన్స్. ఈ బుజ్జి అనేది ఓ వాహ‌నం అని, ‘కల్కి’ కోస‌మే ప్ర‌త్యేకంగా త‌యారు చేశార‌ని చిత్ర‌బృందం ముందే చెప్పేసింది. అయితే ఆ వాహ‌నం ఎలా ఉంటుందో, దాని ప్ర‌త్యేక‌త‌లేంటో ఎవ‌రికీ తెలీదు. ఈ స‌స్పెన్స్‌కు తెర దించుతూ.. బుజ్జిని ప‌రిచ‌యం చేసేసింది చిత్ర‌బృందం. ఇందుకోసం హైద‌రాబాద్ రామోజీ ఫిల్మ్ సిటీలో ఓ భారీ ఈవెంట్ నిర్వ‌హించింది చిత్ర‌బృందం. ఈ వేడుక‌లో… బుజ్జిని డ్రైవ్ చేసుకొంటూ ప్రభాస్ ఎంట్రీ ఇచ్చాడు. ఆ విజువ‌ల్స్‌.. ప్రభాస్ అభిమానుల్ని ఆనందంలో ముంచెత్తాయి. ఓ సినిమాలోని ప్రోప‌ర్టీని ప‌రిచ‌యం చేయ‌డానికి ఇంత భారీ ఎత్తున ఈవెంట్ చేయ‌డం నిజంగా షాకింగ్ విష‌య‌మే.
ఈ వాహ‌నం కూడా ఆషామాషీగా లేదు. దాని డిజైన్ కొత్త‌గా అనిపించింది. ఈ సినిమాలో బుజ్జిది ఓ కీలక పాత్ర. ఆ వాహ‌నానికి కీర్తి సురేష్ డబ్బింగ్ చెప్ప‌డం.. మ‌రింత అందాన్ని, క్రేజ్‌నీ తీసుకొచ్చింది. క‌ల్కిలో వార్ ఎపిసోడ్స్ లో బుజ్జి క‌థానాయ‌కుడికి స‌హాయ‌ప‌డుతుంది. అదే బుజ్జి టీజ‌ర్‌లోనూ చూపించారు. ఓర‌కంగా చెప్పాలంటే ఐఫోన్‌లో వినిపించే `సిరి`కి పూర్తి అప్‌డేటెడ్ వెర్షన్ గా అనిపించింది. ప్రభాస్ – బుజ్జి పాత్ర‌ల మ‌ధ్య సాగే సంభాష‌ణ‌లు ఈ సినిమాలో కావల్సినంత వినోదం పంచి పెట్ట‌డం ఖాయంగా క‌నిపిస్తోంది. సినిమా కోసం ప్ర‌త్యేకంగా వాహ‌నాలు త‌యారు చేయ‌డం ఇది వ‌ర‌కే చూశాం. అయితే.. అలాంటి వెయికిల్స్ బ‌య‌ట న‌డ‌ప‌డానికి ప‌నికి రావు. కానీ.. బుజ్జి మాత్రం ప్ర‌త్యేకం. ఓ ర‌కంగా చెప్పాలంటే బుజ్జి పేరు చెప్పి కొత్త కారు మోడ‌ల్ త‌యారు చేసేసింది చిత్ర‌బృందం. మెకానిక్ ఇంజ‌నీర్స్ చేయాల్సిన ప‌ని… ఓ సినిమా బృందం చేసేసింది. ఇంత‌కంటే గొప్ప‌త‌నం ఏముంది? మొత్తానికి ‘కల్కి’ సినిమాకు బుజ్జి ఓ స్పెష‌ల్ ఎట్రాక్ష‌న్ అయిపోయింది.
