మంచు మోహన్ బాబు కుమారులు విష్ణు, మనోజ్ మధ్య తీవ్ర విబేధాలు ఉన్నాయని అంతర్గతంగా జరుగుతున్న ప్రచారం నిజమేనని మంచు మనోజ్ బయట పెట్టారు . తన దగ్గర పని చేసే ఓ వ్యక్తి ఇంటికి వెళ్లి మరీ తన సోదరుడు విష్ణు దాడి చేశారంటూ ఓ వీడియోను మనోజ్ సోషల్ మీడియాలో విడుదల చేశారు. ఈ వీడియోల ఓ మధ్యతరగతి ఇంట్లోకి చొరబడిన విష్ణు వారిపై దౌర్జన్యం చేస్తున్నట్లుగా ఉంది.
విష్ణు దాడి చేస్తున్న వ్యక్తి సారధి అని.. అతను మంచు కుటుంబం వద్ద చాలా కాలంగా పని చేస్తున్నట్లుగా తెలుస్తోంది. అతను విష్ణు కన్నా మనోజ్ కు దగ్గరగా ఉంటారని చెబుతున్నారు. ఈ క్రమంలో ఏదో విషయంలో తేడా జరగడంలో ఇలా ఇళ్లకు వెళ్లి విష్ణు గొడవ చేస్తున్నట్లుగా తెలుస్తోంది. విష్ణు తరచూ ఇలా ఇళ్లల్లోకి చొరబడి దాడులు చేస్తున్నారని మనోజ్ ఆరోపిస్తున్నారు. దీనికి కారణం ఏమిటన్నది మాత్రం మనోజ్ బయట పెట్టలేదు.
మంచు సోదరులు ఇద్దరూ తమ గొడవల్ని ఇలా ఆన్ లైన్ చేసుకోవడంతో… ఇప్పుడు ఈ వ్యవహారం అంతా రచ్చ రచ్చ అవుతోంది. ఇటీవల రెండో పెళ్లి చేసుకున్న మనోజ్ … చాలా కాలం నుంచి కుటుంబంతో విడిగానే ఉంటున్నట్లుగా తెలుస్తోంది. మరి మనోజ్, విష్ణు మధ్య గొడవలేమిటో కానీ.. ఆ కుటుంబం పరువు మాత్రం ఆన్ లైన్ కు ఎక్కింది. ఇలాంటి వీడియోల కోసం ఎదురు చూసే మీడియా. సోషల్ మీడియా పండగ చేసుకుంటోంది.
