సంక్రాంతి సంబరాలు సెలబ్రిటీలు ఎలా జరుపుకుంటారనే ఆసక్తి సామాన్య జనానికి ఉంటుంది. అయితే ఎక్కువ మంది సెలబ్రిటీలు తాము ఎలా జరుపుకుంటామో బయటకు తెలియనివ్వరు. మెగా ఫ్యామిలీ ఈ ఏడాది మాత్రం.. తమ సంబరాలను .. సంతోషాలను అభిమాన ప్రపంచం కోసం బయట పెట్టింది. సాధారణంగా ప్రతీ ఏడాది సంక్రాంతి పండుగను.. బెంగళూరులోని ఫామ్‌హౌస్‌లో చిరంజీవి కుటుంబం అంతా జరుపుకుంటుంది. ఈ సారి కూడా అక్కడే జరుపుకున్నట్లుగా తెలుస్తోంది. ఆ సందడి.. ఆ సంతోషం.. ప్రతీ క్షణం ఫోటోల రూపంలో సాక్ష్యాలుగా విడుదల చేసింది.
ఈ సారి చిరంజీవి ప్రత్యేకంగా సంబరాలు నిర్వహించారు. గానాబజానా ఏర్పాటు చేశారు. దీనికి కారణం … నాగబాబు కుమార్తెకు కొత్తగా పెళ్లి కావడం.. తమ ఇంట కొత్తల్లుడు రావడమే. తొలిరోజు భోగి మంటలతో ఈ వేడుకలను ప్రారంభించిన మెగా ఫ్యామిలీ.. సంక్రాంతి,కనుమ పండుగల్ని కూడా అదే రేంజ్‌లో జరుపుకుంది. ఇది మెగాస్టార్ ఇంట జరిగిన సంక్రాంతి పండగ కనుక మర్యాదలు కూడా మెగా రేంజులోనే వున్నాయి. ఈ మధ్య చీరంజీవి అంటే ఎక్కువ మంది దోశెలు గుర్తు చేసుకుంటున్నారు. లాక్ డౌన్‌లో ఆయన దోసెలు వేయడం.. అలాగే.. అహా షోలో.. కళ్లకు గంతలు కట్టుకుని దోసెలు వేయడం బాగా పాపులర్ అయిపోయాయి. అందుకే.. భోగిమంటల సమయంలోనూ దోశెల హడావుడి కనిపించింది.
చిరంజీవి కుటుంబసభ్యులు చిన్నా పెద్దా.. అందరూ పాల్గొన్నారు. ఇక మెగా ఇంటి ఆడపడచులు, కోడళ్లతో ప్రత్యేకంగా ఫోటో సెషన్ పెట్టించారు. తన సోదరిమణులతో చెర్రీ దిగిన ఫోటో బాగా ఆకర్షిస్తోంది. సంక్రాంతి రోజు రాత్రి మ్యూజికల్ నైట్ నిర్వహించారు. ఈ మ్యూజికల్ నైట్ ఎంతో సందడిగా సాగింది. అక్కినేని నాగార్జున ప్రత్యేక అతిధిగా హాజరయ్యారు. చిరంజీవి ఫ్యామిలీ సంక్రాంతి సంబరాలు..సోషల్ మీడియాలో ట్రెండింగ్‌గా మారాయి.
