చిరంజీవి కుమార్తె సుస్మిత ఇప్పుడు నిర్మాత‌గా మారింది. ఓయ్ ద‌ర్శ‌కుడు ఆనంద్ రంగా తో ఓ వెబ్ సిరీస్ ని రూపొందిస్తోంది. మెగా త‌న‌య వెబ్ సిరీస్ అంటే… అది ఆహాలోనే స్ట్రీమింగ్ అవుతుంద‌ని ఆశిస్తారు. ఆహా కోస‌మే సుస్మిత వెబ్ సిరీస్ తీస్తుంద‌నుకుంటారు. ఎందుకంటే.. ఆహాకి క‌ర్త క‌ర్మ క్రియ అంతా అల్లు అర‌వింద్‌నే. త‌న ఓటీటీ ఫ్లాట్ ఫామ్ కోసం వెబ్ సిరీస్‌ల‌నూ, సినిమాల్నీ వెదికి ప‌ట్టుకుని కంటెంట్ బ్యాంక్‌ని సంవృద్థి ప‌ర‌చుకోవ‌డానికి అల్లు అర‌వింద్ ఆప‌సోపాలు ప‌డుతున్నారు. మెగా ఇంటి నుంచి ఓ వెబ్ సిరీస్ వ‌స్తోంటే, అది ఆహా ఖాతాలోకే అనుకోవ‌డం స‌హ‌జం. కానీ… సుస్మిత మాత్రం త‌న వెబ్ సిరీస్‌ని జీ5కి ఇచ్చేసింది. ఇందుకు సంబంధించిన ఎగ్రిమెంట్లు కూడా పూర్త‌య్యాయి.
ఇదో క్రైమ్ థ్రిల్ల‌ర్‌. మొత్తం ఎనిమిది ఎపిసోడ్లు ఉంటాయి. హైద‌రాబాద్ న‌గ‌ర నేప‌థ్యంలో సాగుతుంది. పోలీస్‌లూ – హంత‌కుల మ‌ధ్య జ‌రిగే వెదుకులాట, ఇన్వెస్టిగేష‌న్ ఈ వెబ్ సిరీస్ సారాంశం. ప్ర‌స్తుతం హైదరాబాద్‌లో లాక్ డౌన్ నియ‌మ నిబంధ‌న‌ల్ని ఆచ‌రిస్తూ.. షూటింగ్ మొద‌లెట్టారు. టైటిల్ ఇంకా ఖ‌రారు కాలేదు.
