నితిన్ త్వ‌ర‌లోనే ‘భీష్మ’గా రానున్నాడు. ఈనెల 21న ఈ చిత్రం విడుదల అవుతోంది. `రంగ్ దే` కూడా సెట్స్‌పై ఉంది. చంద్ర‌శేఖ‌ర్ యేలేటి తో `చెక్‌` సినిమా స‌గం పూర్త‌యిపోయింది. ఈలోగా మరో సినిమాకి గ్రీన్ సిగ్న‌ల్ ఇచ్చేశాడు. బాలీవుడ్‌లో ఘ‌న విజ‌యం సాధించిన అంధాధున్‌ని తెలుగులో రీమేక్ చేద్దామ‌నుకుంటున్నారు. ఠాగూర్ మ‌ధు, సుధాక‌ర్ రెడ్డి నిర్మాత‌లు. ఈ సినిమాలో నితిన్ హీరోగా న‌టిస్తాడు. ద‌ర్శ‌కుడి ఎంపిక కూడా ఖాయ‌మైపోయింది. మేర్ల‌పాక గాంధీ ఈ చిత్రానికి ద‌ర్శ‌కత్వం వహించనున్నాడని స‌మాచారం. వెంక‌టాద్రి ఎక్స్‌ప్రెస్‌తో ద‌ర్శ‌కుడిగా ఆక‌ట్టుకున్నాడు మేర్ల‌పాక. ఆ త‌ర‌వాత ఎక్స్‌ప్రెస్ రాజా ర‌న్ కూడా మంచి విజ‌యాన్ని అందించింది. నానితో తీసిన కృష్ఱార్జున యుద్ధం మాత్రం తేడా కొట్టింది. అప్ప‌టి నుంచీ.. ఈ ద‌ర్శ‌కుడు క‌థ‌లు ప‌ట్టుకుని తిరుగుతూనే ఉన్నాడు. ఎట్ట‌కేల‌కు ఈ రీమేక్ ఓకే అయ్యింది. కాక‌పోతే నితిన్ డేట్లు దొర‌క‌డం క‌ష్టంగా మారింది. వ‌రుస సినిమాల‌తో బిజీగా ఉండ‌డ‌మే అందుకు కార‌ణం. ఈ యేడాది చివ‌రి నాటిక‌ల్లా ఈ సినిమా ప‌ట్టాలెక్కే అవ‌కాశం ఉంది.
మేర్ల‌పాక గాంధీతో నితిన్?
