తెలుగు సినిమాల్లో తెలంగాణ యాస, సంస్కృతి గ‌ట్టిగా ప్ర‌తిబింబిస్తోంది. ముఖ్యంగా యువ హీరోలెక్కువ‌మంది ఈ నేప‌థ్యాన్ని ఎంచుకుంటున్నారు. విజ‌య్ దేవ‌ర‌కొండ తెలంగాణ హీరోనే కాబ‌ట్టి.. ఆ స్లాంగ్ భ‌లేగా పండిస్తుంటాడు. `ల‌వ్ స్టోరీ` కూడా తెలంగాణ బ్యాక్ గ్రౌండ్ లో తెర‌కెక్కిన క‌థే. ఈ సినిమా కోసం నాగ‌చైత‌న్య తెలంగాణ యాస ని నేర్చుకున్నాడు. ఇప్పుడు నాని కూడా అదే బాట ప‌ట్టాడు. నాని క‌థానాయ‌కుడిగా సుధాక‌ర్ చెరుకూరి ఓ చిత్రాన్ని నిర్మిస్తున్నారు. శ్రీ‌కాంత్ ఈ చిత్రంతో ద‌ర్శ‌కుడిగా ప‌రిచ‌యం అవుతున్నారు. ఈ సినిమా కోసం నాని తొలిసారి తెలంగాణ యాస నేర్చుకుంటున్నాడ‌ట. తెలంగాణ నేప‌థ్యంలో సాగే క‌థ ఇది. ఓ తెలంగాణ అబ్బాయిగా నాని పాత్ర‌ని డిజైన్ చేశారు. కాబ‌ట్టి.. నానికి ఈ భాష‌లో ప‌ట్టుసాధించ‌డం అవ‌స‌రమైంది. అందుకోసం ఓ ట్యూట‌ర్ ని నియ‌మించుకున్నాడ‌ట. గ‌తంలో `కృష్ణార్జున యుద్ధం` కోసం రాయ‌ల‌సీమ యాస నేర్చుకున్నాడు నాని. నాని `ట‌క్ జ‌గ‌దీష్‌`, `శ్యామ్ సింగ‌రాయ్‌` షూటింగులు పూర్తి చేసుకున్నాయి. ప్ర‌స్తుతం `అంటే.. సుంద‌రానికి` సినిమా ప‌నుల్లో బిజీగా ఉన్నాడు నాని. ఆ త‌ర‌వాత శ్రీ‌కాంత్ సినిమా మొద‌ల‌వుతుంది.
తెలంగాణ యాస నేర్చుకుంటున్న నాని
