నేచుర‌ల్ స్టార్ నానిలో ఓ నిర్మాత కూడా ఉన్నాడు. వాల్ పోస్ట‌ర్ అనే బ్యాన‌ర్ స్థాపించి…. సినిమాలు తీస్తున్నాడు నాని. ఇందుకోసం బంజారా హిల్స్‌లో ఓ ఆఫీస్ కూడా తెరిచాడు. ‘అ’ సినిమా ఈ బ్యాన‌ర్ నుంచే వచ్చింది. తాజాగా మరో సినిమాకి శ్రీ‌కారం చుట్ట‌బోతున్నాడు. క‌థ కూడా సిద్ధ‌మైపోయింది. ఆస్ట్రేలియాలో చ‌దువుకుని వ‌చ్చిన ఓ కుర్రాడు నానికి క‌థ చెప్పి మెప్పించాడు. డైలాగ్ వెర్ష‌న్‌తో స‌హా… స్క్రిప్టు సిద్ధంగా ఉంద‌ని, నాని ఈ క‌థ విన‌గానే గ్రీన్ సిగ్న‌ల్ ఇచ్చాడ‌ని, ఒక్క మార్పు కూడా చెప్ప‌లేద‌ని తెలుస్తోంది. ఇదో థ్రిల్ల‌ర్ అని స‌మాచారం. ‘అ’లాగే ప్ర‌యోగాత్మ‌కంగా ఉంటూనే క‌మ‌ర్షియ‌ల్ యాంగిల్‌లో సాగ‌బోతోంద‌ట. ఒక్క పాటకు కూడా ఛాన్స్ లేని సినిమా ఇది. మొదటి స‌న్నివేశం నుంచి, చివ‌రి స‌న్నివేశం వ‌ర‌కూ ప్రేక్ష‌కుడ్ని సీటు అంచున కూర్చోబెట్ట‌గ‌లిగేంత ఆసక్తిక‌రంగా ఈ క‌థ న‌డుస్తుంద‌ని తెలుస్తోంది. ఓ యాక్ష‌న్ ఇమేజ్ ఉన్న క‌థానాయ‌కుడికి ఈ క‌థ సూట‌వుతుంద‌ని తెలుస్తోంది. ఆ క‌థానాయ‌కుడి కోసం వేట సాగుతోంది. ఈ సినిమా వ‌ర‌కూ నాని కేవ‌లం నిర్మాత‌గానే ఉండిపోబోతున్నాడు. ఆగ‌స్టులో ఈ చిత్రం ప్రారంభ‌మ‌య్యే అవ‌కాశాలున్నాయి.
నాని సినిమా ఎలా ఉండ‌బోతోంది?
