హిట్ 2లో… మ‌రో హీరో కూడా..

విశ్వ‌క్ సేన్ క‌థానాయ‌కుడిగా న‌టించిన చిత్రం `హిట్`. స‌స్పెన్స్ థ్రిల్ల‌ర్ గా రూపొందించిన ఈ చిత్రం బాక్సాఫీసు ద‌గ్గ‌ర మంచి విజ‌యాన్ని అందుకుంది. నిర్మాత‌గా నానికి లాభాలు తెచ్చిపెట్టింది. అదే ఉత్సాహంతో హిట్ 2 ప్ర‌క‌టించాడు నాని. ఈలోగా హిట్ సినిమా బాలీవుడ్ లో తీసే ప్ర‌య‌త్నాలు మొద‌ల‌య్యాయి. దాంతో హిట్ 2 ఉంటుందా, లేదా? అనే అనుమానాలు వ్య‌క్తం అయ్యాయి. పైగా విశ్వ‌క్ సేన్ కూడా వ‌రుస సినిమాల‌తో బిజీగా ఉండ‌డంతో హిట్ 2 ఆల‌స్యం అవుతుందేమో అనుకున్నారు. అయితే హిట్ 2కి సంబంధించిన ప‌నులు మొద‌లైపోయాయి. స్క్రిప్టు దాదాపుగా పూర్తి కావొచ్చింది. సీక్వెల్ లోనూ… విశ్వ‌క్‌సేన్ నే క‌థానాయ‌కుడిగా న‌టిస్తున్నాడు. అయితే. విశ్వ‌క్ తో పాటు ఈ సినిమాలో మ‌రో హీరో కూడా క‌నిపిస్తాడ‌ట‌. ఆ హీరో ఎవ‌ర‌న్న‌ది ప్ర‌స్తుతానికి స‌స్పెన్స్‌. నానికి అత్యంత స‌న్నిహితంగా ఉండే ఓ యువ క‌థానాయ‌కుడు ఈసినిమాలో న‌టిస్తాడ‌ని, అయితే త‌న‌ది విల‌న్ పాత్ర అని.. స‌మాచారం. సినిమా చివ‌రి వ‌ర‌కూ ఆ హీరో ఎవ‌ర‌న్న‌ది స‌స్పెన్స్ లో ఉంచ‌బోతున్నార్ట‌. మ‌రి ఆ హీరో ఎవ‌రో తెలియాలంటే ఇంకొన్ని రోజులు ఆగాలి.