వైకాపా అధ్యక్షుడు జగన్మోహన్ రెడ్డి ఆంద్రప్రదేశ్ కి ప్రత్యేక హోదా కోరుతూ ఈనెల 26 నుండి గుంటూరులో ఆమరణ నిరాహారా దీక్షకు కూర్చోబోతున్నారు. కానీ ప్రతీసారి ఏదో ఒక అంశం మీద ఆయన దీక్ష చేయడం, దానికి పార్టీ నేతలు భారీ ప్రచారం, జనసమీకరణ చేస్తుంటారు. కానీ కొన్నిసార్లు జనసమీకరణ చేయడంలో విఫలమయినప్పుడు జగన్ అభాసుపాలయిన సందర్భాలున్నాయి. కనుక ఈసారి జగన్ దీక్షకు రాష్ట్రం నలుమూలల నుండి విద్యార్ధులను, యువకులను ఆకర్షించేందుకు జగన్ స్వయంగా వివిధ జిల్లాలో విద్యార్దీ సంఘాలతో సమావేశం అయ్యి ప్రత్యేక హోదాపై పోరాటం చేయవలసిన ఆవశ్యకత గురించి వివరించబోతున్నారు. ఆ ప్రయత్నంలో భాగంగానే తిరుపతి యస్వీ యూనివర్సిటీ విద్యార్దులతో సమావేశం కావాలనుకొన్నారు.
కానీ విశ్వవిద్యాలయంలో వైకాపా రాజకీయ సమావేశాలను అనుమతించబోమని ప్రభుత్వం చెప్పడంతో వైకాపా నేతలు ప్రభుత్వంపై మండిపడుతున్నారు. ప్రత్యేక హోదాపై రాష్ట్ర ప్రభుత్వానికి శ్రద్ద లేదు కనుకనే తమ సమావేశానికి అనుమతి నిర్కారిస్తోందని విమర్శిస్తున్నారు. కానీ తమ అధినేత జగన్ విద్యార్ధులతో తప్పకుండా సమావేశం అవుతారని వైకాపా నేత చెవిరెడ్డి భాస్కర్ రెడ్డి ప్రకటించారు. ఈవిధంగా కూడా వైకాపా మీడియా దృష్టిని ఆకర్షించాలని ప్రయత్నిస్తున్నట్లుంది. జగన్మోహన్ రెడ్డిని యూనివర్సిటీలో సమావేశం నిర్వహించకుండా పోలీసులు అడ్డుకొన్నట్లయితే, ప్రత్యేక హోదా కోసం తమ పార్టీ పోరాడుతుంటే దానినీ ప్రభుత్వం పోలీసులచేత అణచి వేయించేస్తోందని ఆరోపిస్తూ జగన్ అక్కడే మరో దీక్షకు కూర్చొంటారేమో?
