స్వర్ణ ప్యాలెస్ అగ్నిప్రమాద ఘటన విషయంలో రమేష్ ఆస్పత్రిపై పూర్తి స్థాయిలో దృష్టి కేంద్రీకరించారు పోలీసులు. ఇప్పటికే ఆస్పత్రి చైర్మన్ రమేష్‌కు.. విచారణకు హాజరు కావాలని నోటీసులు ఇచ్చారు. అదే సమయంలో గుంటూరు రమేష్ ఆస్పత్రి చీఫ్ ఆపరేటింగ్ ఆఫీసర్‌గా ఉన్న డాక్టర్ మమతకు నోటీసులు ఇచ్చి విచారణకు పిలిపించారు. డాక్టర్ మమత మాజీ ఎంపీ రాయపాటి సాంబశివరావు కోడలు. విజయవాడ సౌత్ ఏసీపీ కార్యాలయంలో విచారణకు డాక్టర్ మమత హాజరయ్యారు.
నిజానికి ప్రమాదం జరిగింది విజయవాడలో. స్వర్ణ ఆస్పత్రిలో కోవిడ్ సెంటర్ నిర్వహిస్తోంది కూడా విజయవాడ ఆస్పత్రి ఆధ్వర్యంలోనే. అయినప్పటికీ..గుంటూరు ఆస్పత్రికి సీవోవోగా ఉన్న డాక్టర్ మమతకు విజయవాడ పోలీసులు నోటీసులు ఇచ్చి పిలిపించి ప్రశ్నించడం రాజకీయ ఆరోపణలకు కారణం అవుతోంది. ప్రభుత్వ వైద్య శాఖ ఉన్నతాధికారులే ప్రముఖ ఆస్పత్రులపై…కోవిడ్ సెంటర్లుగా మరిన్ని బెడ్లను ఏర్పాటు చేయాలని ఒత్తిడి తెచ్చారని.. ఆస్పత్రుల యాజమాన్యాలు చెబుతున్నాయి. వందే భారత్ మిషన్ లో భాగంగా..ఏపీకి వస్తున్న వారందరికి హోటళ్లలోనే క్వారంటైన్ ఏర్పాటు చేశారు. ఆ క్వారంటైన్ సెంటర్లనే తర్వాత కోవిడ్ ఆస్పత్రులుగా మార్చారు.
అయితే ఇప్పుడు… స్వర్ణ ప్యాలెస్ కు కోవిడ్ ఆస్పత్రిగా అనుమతులు ఇచ్చిన అధికారులను కనీసం ప్రశ్నించకుండా..వైద్యులను అరెస్ట్ చేయడం… వైద్యలకు నోటీసులు ఇచ్చి… స్టేషన్లకు పిలిపించడం వివాదాస్పదమవుతోంది. సీఆర్పీసీ ప్రకారం ఆస్పత్రి చైర్మన్ రమేష్‌కు నోటీసులు ఇచ్చిన పోలీసులు.. అంతకు రెండు రోజుల ముందు నుంచే పరారీలో ఉన్నారని మీడియాకు చెప్పడం ప్రారంభించారు. రమేష్ ఆస్పత్రి చైర్మన్ ను పట్టుకోవడానికి నియమించాలని చెప్పి.. .తర్వాత నోటీసులు ఇచ్చినట్లుగా మీడియాకు చెబుతున్నారు. పోలీసుల తీరుపై ఇప్పటికే ఆలిండియా మెడికల్ డాక్టర్స్ అసోసియేషన్ అసంతృప్తి వ్యక్తం చేసి.. పోలీసులకు లేఖ రాసింది. డాక్టర్లను బాధ్యులను చేయడం ప్రాథమిక న్యాయసూత్రాలకు విరుద్ధమని తన లేఖలో స్పష్టం చేసింది. అయినప్పటికీ..పోలీసులు వైద్యులను మాత్రమే టార్గెట్ చేశారు.
