ఆర్జే.. (రేడియో జాకీ)ల‌కూ టాలీవుడ్ కు గట్టి అనుబంధ‌మే ఉంది. కొంత‌మంది ఆర్.జేలు న‌టుల‌య్యారు. ఇంకొంత‌మంది డ‌బ్బింగ్ ఆర్టిస్టులుగా మారారు. కొంద‌రు హీరోలుగానూ మారారు. ఇప్పుడు ఓ ఆర్.జే మెగాఫోన్ ప‌ట్ట‌బోతోంది. త‌నే.. ఆర్జే శ్వేత. రేడియో జాకీగా శ్వేత అంద‌రికీ సుప‌రిచిత‌మే. డార్లింగ్ శ్వేత‌గా త‌న‌కు మంచి గుర్తింపు ఉంది. స్వ‌త‌హాగా డ‌బ్బింగ్ ఆర్టిస్ట్ కూడా. చాలామంది క‌థానాయిక‌ల‌కు గొంతు అరువిచ్చింది. ‘ఉప్పెన’లో బేబ‌మ్మ‌గా న‌టించిన కృతిశెట్టికి త‌నే వాయిస్ ఇచ్చింది. ఇప్పుడు ద‌ర్శ‌కురాలిగా మారుతోంది.
బిగ్ బెన్ ప్రొడ‌క్ష‌న్‌లో ఓ కొత్త సినిమా త్వ‌ర‌లోనే శ్రీ‌కారం చుట్టుకోబోతోంది. దీనికి శ్వేత ద‌ర్శ‌కురాలు. బిగ్ బెన్ సంస్థ‌కు కొత్త ద‌ర్శ‌కుల్ని ప‌రిచ‌యం చేయ‌డం అల‌వాటు. త‌రుణ్ భాస్క‌ర్‌, భ‌ర‌త్ క‌మ్మ, కె.వి.ఆర్. మ‌హేంద్ర, సంజీవ్ రెడ్డి, ప్ర‌ణీత్‌, చెందు ముద్దు ఇలా కొత్త టాలెంట్ ప్రోత్స‌హిస్తోంది. ఇప్పుడు శ్వేత‌ని కెప్టెన్ కుర్చీలో కూర్చోబెట్టింది. ఈ చిత్రానికి సంబంధించిన పూర్తి వివ‌రాలు అతి త్వ‌ర‌లో చిత్ర‌బృంద‌మే స్వ‌యంగా వెల్ల‌డించ‌నుంది,.
