రోడ్డు ప్ర‌మాదంలో సాయిధ‌ర‌మ్ తేజ్ గాయ‌ప‌డ‌డం, ఆ త‌ర‌వాత షూటింగుల‌కు దూరం అవ్వ‌డం, క్ర‌మంగా కోలుకొని మ‌ళ్లీ కెమెరా ముందుకు రావ‌డం తెలిసిన విష‌యాలే. ప్ర‌మాదం త‌ర‌వాత తాను చేసిన సినిమా `విరూపాక్ష`. ఇప్పుడు విడుద‌ల‌కు సిద్ధ‌మైంది. రోడ్డు ప్ర‌మాదం త‌ర‌వాత కోలుకొని, సెట్ కి వెళ్లింది విరూపాక్ష‌తోనే. అయితే.. ఈ షూటింగ్ అనుకొన్నంత సుల‌భంగా సాగ‌లేదు. సాయిధ‌ర‌మ్ తేజ్‌కి సెట్లో పెద్ద ప‌రీక్ష పెట్టింది. గాయం నుంచి కోలుకొన్నా – తేజ్ నోటి నుంచి మాట రావ‌డం క‌ష్ట‌మైంది. దాంతో.. సెట్లో తేజ్ ఏం మాట్లాడుతున్నాడో.. ఎదుట ఉన్న అర్టిస్టుకీ, మానేట‌ర్ ముందు కూర్చున్న ద‌ర్శ‌కుడికీ అర్థం కాని ప‌రిస్థితి. ఇలాంటి స‌మ‌యంలోనే… తేజ్ మైమ్ చేయాల్సివ‌చ్చింద‌ట. డైలాగులు చెప్ప‌డు కానీ.. లిప్ మూమెంట్ మాత్రం ఇస్తుంటాడు. దాన్ని అర్థం చేసుకొని, ఎదుటి ఆర్టిస్టు న‌టించాల్సి వ‌స్తుంది. ఈ ప్ర‌క్రియ.. కొన్ని రోజుల పాటు కొన‌సాగింది. ఆ త‌ర‌వాత… తేజ్ కాస్త కుదుట ప‌డి, సెట్లో తన డైలాగులు తానే చెప్పుకోగ‌లిగే స్థాయికి చేరుకొన్నాడు. ఇది ఓ ర‌కంగా తేజూకే కాదు. సెట్లో ఉన్న మిగిలిన న‌టీన‌టుల‌కు, ద‌ర్శ‌కుడికీ ప‌రీక్షే. అయితే… ద‌ర్శ‌కుడు, ఇత‌ర న‌టీన‌టుల స‌హ‌కారంతో తేజ్ ఈ ప‌రీక్ష పాసైపోయాడు. అందుకే ఈ సినిమాకి తేజ్ ఎమోష‌న‌ల్‌గా కనెక్ట్ అయిపోయాడు. ఇప్ప‌టికీ తేజ్…. మాట‌లు కాస్త త‌డ‌బ‌డుతూనే ఉన్నాయి. `విరూపాక్ష` ప్రెస్ మీట్ నిన్న హైద‌రాబాద్ లో జ‌రిగింది. ఈ సంద‌ర్భంగా.. సెట్లో తాను ప‌డిన క‌ష్టాల్ని గుర్తు చేసుకొన్నాడు తేజ్.
