ప్రస్తుతం తెలుగు పరిశ్రమలో కొత్త హీరోల హవా బాగా నడుస్తుందని చెప్పొచ్చు. పరిశ్రమతో సంబంధం లేని చిన్న హీరోలు కూడా మంచి హిట్ సినిమాలను తీస్తూ ప్రేక్షకులకు దగ్గరవుతున్నారు. ఈమధ్యనే వచ్చిన ఇద్దరు తెలుగు హీరోలు తమ నటనతో తెలుగు ప్రేక్షకులకు హృదయాల్లో స్థానం సంపాదించుకుంటున్నారు. వారిలో ముందుగా చెప్పుకోవాల్సి వస్తే రాజ్ తరుణ్ ముందుంటాడు. ఉయ్యాల జంపాల సినిమాతో అనుకోకుండా హీరోగా మారిన ఈ కుర్రాడు అసలు దర్శకుడవ్వాలనే ఆలోచనతో పరిచయాలు పెచుకున్నాడు. దాదాపు అర్ధ సెంచరీ దాకా షార్ట్ ఫిల్మ్స్ తీసి తన టాలెంట్ ఏంటో అందరికి తెలియ చేశాడు. అనుకోకుండా విరించి వర్మ సినిమాకు అసిస్టెంట్ గా పనిచేస్తుండటం.. ఆ సినిమా హీరోకి ఎవరు నప్పకపోవడంతో చివరకు తానే చేయడం జరిగింది.
ఇక ఆ సినిమా హిట్ తర్వాత సినిమా చూపిస్త మావ, కుమార్ 21ఎఫ్ ఇలా దర్శకుడిగా మారుదామని వచ్చి సక్సెస్ ఫుల్ హీరోగా మారాడు రాజ్. ఇక రాజ్ అంత సూపర్ సక్సెస్ అవ్వకపోయినా ఊహలు గుసగుసలాడే సినిమాతో తెరంగేట్రం చేశాడు నాగశౌర్య. చేసే సినిమా మీద పూర్తి అవగాహనతో ముందుకెళ్తున్న ఈ యువ కెరటం కూడా తీసిన సినిమాలను ప్రేక్షకులకు చేరువేయడంలో సఫలం అవుతున్నాడు. దిక్కులు చూడకు రామయ్య సినిమాతో పర్వాలేదనిపించుకున్న నాగశౌర్య ప్రస్తుతం నందిని రెడ్డి కళ్యాణ వైభోగమే సినిమాలో నటిస్తున్నాడు. అదే కాకుండా మెగా హీరోయిన్ నిహారిక తెరంగేట్రం చేస్తున్న ‘ఒక మనసు’ సినిమాలో కూడా హీరో నాగశౌర్య కావడం విశేషం.
అటు రాజ్, ఇటు నాగ శౌర్య ఇద్దరు ఫుల్ స్వింగ్ లో సినిమాలు చేస్తూ కుర్ర హీరోలకు మంచి పోటీ ఇస్తున్నారు. దశాబ్ధ కాలంగా సినిమాలు కనీసం ఒక్క హిట్ మొహం చూడని హీరోలు వీరిద్దరిని చూసి కుళ్లు కుంటున్నారనే చెప్పాలి. ప్రస్తుతం రాజ్ తరుణ్ వర్మ , మంచు విష్ణు సినిమాలు చేస్తుంటే.. నాగ శౌర్య భారీ నిర్మాణ సంస్థ యు.వి క్రియేషన్స్ తీయబోయే సినిమాలో హీరోగా ఓకే అయ్యాడు.
ప్రతిభ ఉంటే చాలు ఎటువంటి బ్యాక్ గ్రౌండ్ లేకపోయినా తెలుగు పరిశ్రమలో రాణించొచ్చని ఈ ఇద్దరు హీరోలు చాటిచెప్పారు. ప్రస్తుతం ఫుల్ ఫాం మీదున్న ఇద్దరు హీరోలు కెరియర్ ఇలానే సూపర్ సక్సెస్ ఫుల్ గా సాగాలని కోరుకుందాం.
