తెలుగు అకాడెమీ పేరును తెలుగు, సంస్కృత అకాడెమీగా మార్చిన ఏపీ ప్రభుత్వం అందులో కొత్తగా పదవుల్ని కొంత మందికి కట్టబెట్టింది. తెలుగు అకాడెమీ చైర్మన్‌గా పదవి కట్టిబెట్టి.. లక్ష్మిపార్వతికి చాలా కాలంగా నుంచి జీతభత్యాలు ఇస్తున్నారు. ఇప్పుడు.. పేరు మార్చి ఆమెకు సంస్కృతం కూడా ఇచ్చారు. తెలుగు- సంస్కృతం రెండు కలిపిన అకాడెమీగా మార్చారు. సంస్కృతం అంటే ఇప్పుడు ఇంటర్ మీడియట్ విద్యార్థులకు తెలుగులోనే తెలుసు. తెలుగులోనే సంస్కృతాన్ని రాసి.. వందకు వంద మార్కులు తెచ్చుకుంటూ ఉంటారు. అందుకే ఏపీ ప్రభుత్వం కూడా.. తెలుగే సంస్కృతం అనుకుందేమో కానీ… విడివిడిగా బోర్డులెందుకని ఒక్క బోర్డులోనే రెండింటిని కలిపేసింది.ఖర్చు తగ్గించుకుంది.
దీనిపై భాషాభిమానులు రగిలిపోతున్నారు. ఇదేం పద్దతని అంటున్నారు. తెలుగు భాషను చరిత్రలో లేకుండా చేసే కుట్ర జరిగిపోతోందని బాధపడుతున్నారు. కానీ చాలా మందికి ప్రభుత్వం తీరుపై ఆశ్చర్యం కలగడం లేదు. ఎందుకంటే.. అసలు తెలుగు నేర్పించడమే మానేయాలని ఎప్పుడో ఏపీ సర్కార్ నిర్ణయించుకుంది. మొత్తం ఇంగ్లిష్ మీడియం అని చెబుతోంది. అప్పుడు కూడా ఇంతగా గగ్గోలు పెట్టలేదు మేధావులు. ఇంగ్లిష్‌లో చదువుతేనే ఉద్యోగాలొస్తాయని.. రోబోటిక్స్ గురించి తెలుసుకోవచ్చని సీఎం జగన్ చెబితే…బాగు బాగు అని భజన చేశారు కానీ.. మాతృభాష గొప్పదనం.. తెలుగుకు పట్టే అవసాన స్థితి గురించి మాత్రం పెద్దగా ఎవరూ చర్చించలేదు. పైగా నిండు సభలో.. తెలుగుకు కులం ఆపాదిస్తే.. కొంత మంది నవ్వుకున్నారు.
ఆంధ్రప్రదేశ్ ప్రభుత్వ పెద్దలు..వారి సలహాదారులు.. లక్షలకు లక్షలు జీతాలు తీసుకుంటున్న ప్రముఖులు ఎవరికీ.. తెలుగు పట్ల కొంచెమైనా సదభిప్రాయం ఉందని.. ఎవరూ అనుకోరు. ఈ రెండేళ్ల కాలంలో ప్రభుత్వం తీసుకున్న నిర్ణయాలే దీనికి కారణం. తెలుగునే లేకుండా చేయాలనుకున్న ప్రభుత్వం ఇప్పుడు తెలుగు అకాడెమీని కూడా నిర్వీర్యం చేయాలనుకోవడం.. ఊహించకుండా వచ్చి పడిన ఉత్పాతం ఏమీ కాదు. మొదట్లోనే స్పందించి.. తెలుగును కాపాడుకోవాలన్న ఆలోనచ చేసి ఉంటే.. ఈ దుస్థితి వచ్చేది కాదు. ఇప్పుడు.. వగర్చి ప్రయోజనం లేదు. తెలుగుపై ఎప్పుడైనా ప్రభుత్వ పెద్దలు కులముద్రవేశారో.. అప్పుడే భాష అంతర్థానం అయిపోయింది. ఇప్పుడు తెలుగు లేదు.. అంతా తెగులే. దానికి అకాడెమీ ఉన్నా లేకపోయినా… సంస్కృతంలో కలిపేసి ఉన్నా ఒక్కటే.
