సుకుమార్ సినిమాల్లో స్క్రీన్ ప్లే త‌ర‌వాత, ఐటెమ్ పాటే హైలెట్టు. ‘ఆ అంటే అమ‌లాపురం’ ద‌గ్గ‌ర్నుంచి ‘ఊ అంటావా’ వ‌ర‌కూ ఆయన ఇచ్చిన అన్ని పాట‌లూ హిట్టే. మిగిలిన సినిమాల్లో ఐటెమ్ పాట వేరు, సుక్కు సినిమాల్లో ఐటెమ్ వేరు. సుకుమార్ అన‌గానే దేవిశ్రీ ప్ర‌సాద్ కూడా ఇర‌గ‌బ‌డి, ట్యూన్లు ఇచ్చేస్తుంటాడు. అందుకే అంద‌రి దృష్టీ ఐటెమ్ పాట మీద ఉంటుంది. ‘పుష్ష 2’లోనూ అదిరిపోయే ఓ ప్ర‌త్యేక గీతం ఉంది. మ‌రి ఆ పాట‌లో క‌నిపించే క‌థానాయిక ఎవ‌రు? అంటూ చాలాకాలంగా టాలీవుడ్ ఆస‌క్తిక‌రంగా చ‌ర్చించుకొంటోంది. ఈలోగా చాలామంది క‌థానాయిక‌ల పేర్లు కూడా వినిపించాయి. జాన్వీక‌పూర్ ఐటెమ్ గాళ్ గా మెర‌వ‌డం ఖాయం అనుకొన్నారు. ఇప్పుడు ‘యానిమల్’ ఫేమ్ త్రిప్తి దిమ్రిని ఫైన‌ల్ చేసిన‌ట్టు ఇన్ సైడ్ వర్గాలు చెబుతున్నాయి.
‘యానిమల్’ రిలీజ్ అవ్వ‌గానే పుష్ష టీమ్ త్రిప్తి పేరుని ఐటెమ్ గాళ్ లిస్టులో చేర్చింది. కానీ…ఖాయం చేయ‌లేదు. మ‌ధ్య‌లో చాలామంది పేర్లు ప‌రిశీలించాక, చివ‌రికి త్రిప్తి అయితేనే బాగుంటుంద‌ని సుకుమార్ టీమ్ భావించింది. త్వ‌ర‌లోనే రామోజీ ఫిల్మ్ సిటీలో ఈ పాట‌ని తెర‌కెక్కించే అవ‌కాశాలు క‌నిపిస్తున్నాయి. ప్ర‌స్తుతం షూటింగ్ అక్క‌డే జ‌రుగుతోంది. ఈ సినిమా కోసం మ‌లేషియా సెట్ ని ఫిల్మ్‌సిటీలోనే తీర్చిదిద్దారు. మిగిలిన షూటింగ్ అంతా ఈ సెట్లోనే జ‌ర‌గ‌బోతోంది. ఐటెమ్ గీతాన్నీ ఇక్క‌డే పూర్తి చేసే అవ‌కాశాలు క‌నిపిస్తున్నాయి.
