జగన్ మోహన్ రెడ్డి చెప్పాడంటే చేస్తారంతే. ఇంకా చెప్పాలంటే… చెప్పిన డెడ్ లైన్ కంటే ముందే చేసేస్తారు. ఐ ప్యాక్ ఆఫీసుకు వెళ్లి ఎన్నికల ఫలితాలు దేశం మొత్తం షాక్ కు గురి చేస్తాయని అందరూ వైసీపీ వైపు చూస్తారని చెప్పుకొచ్చారు. ఆ పనిని ముందే చేసి చూపించారు. ఇప్పుడు దేశం మొత్తం ఏపీ వైపు చూస్తోంది. ఇంత అరాచక పార్టీని ప్రజలు ఎలా భరిస్తున్నారని ఆశ్చర్యపోతున్నారు. ఎన్నికల సమయంలో చోటు చేసుకుంటున్న వరుస ఘర్షణల్లో వైసీపీ నేతల నిర్వాకం ఒకటొకటిగా బయటకు వస్తోంది.
పోలింగ్ రోజున వైసీపీ నేతలు చేసిన దాడులు దృశ్యాలు సోషల్ మీడియాలో వైరల్ అయ్యాయి. బీహార్, బెంగాల్ లోనూ ఇంత బహిరంగ దాడులు ఉండవని ఆశ్చర్యపోయారు. పోలీసు వ్యవస్థ అంతా ఏమయిందని అవాక్కయ్యారు. ఆ తర్వాత మూడు రోజుల పాటు దాడులు సాగాయి. మొత్తం పోలీసు వ్యవస్థ నిర్వీర్యం అయిందని… వైసీపీ సేవలో తరిస్తోందని.. ప్రజల ప్రాణాలకు గ్యారంటీ ఇవ్వడం లేదని మళ్లీ చెప్పుకున్నారు. ఈ ఎపిసోడ్ జరుగుతూండగానే ఈవీఎం ధ్వంసం కేసు వెలుగులోకి వచ్చింది. దాంతో మరోసారి వైసీపీ గూండాయిజం చర్చనీయాంశమయింది.
వైనాట్ 175 అని జగన్ రెడ్డి పదే పదే ఎందుకు అంటున్నాడో.. ఆయన వ్యవస్థల్ని ఏపీలో ఏ స్థితికి తీసుకు వచ్చాడో అందరికీ స్పష్టత వచ్చింది. రెండు రోజుల నుంచి ఇదే అంశంపై దేశవ్యాప్త చర్చ జరుగుతోంది. నిందితుడైన ఎమ్మెల్యేను తప్పించడం కోసం సివిల్ సర్వీస్ అధికారులే తమ అధికార హోదాను దుర్వినియోగం చేస్తూండటం .. బరితెగించిన వ్యవస్థల్లోని పెద్దల ఆకృత్యాలకు అద్దం పడుతోంది. మొత్తానికి జగన్ రెడ్డి నిర్వాకం..దేశవ్యాప్తంగా వైరల్ అవుతోంది. దేశం మొత్తం వైసీపీ వైపు చూస్తోంది.
