తెలంగాణ ముఖ్యమంత్రి కల్వకుంట్ల చంద్రశేఖరరావు, ఏబీఎన్‌ ఆంధ్రజ్యోతి మీడియా గ్రూప్‌ అధిపతి రాధాకృష్ణల మధ్య మొన్నమొన్నటి వరకు పచ్చగడ్డి వేస్తే భగ్గుమనే పరిస్థితి నెలకొని ఉన్న సంగతి అందరికీ తెలిసిందే. ఒక రాజకీయ నాయకుడు, ఒక మీడియా సంస్థ అధినేత అనే ధోరణుల్లో కాకుండా.. ఈ ఇద్దరూ వ్యక్తిగతమైన శత్రువులేమో అనిపించేంతగా.. ఒకరి మీద ఒకరు విమర్శలు చేసుకోవడం.. ఒకరి పనిపట్టడానికి మరొకరు పంతం పూనడం.. వ్యవహరించడం చేస్తూ వచ్చారు. అయితే కొన్నాళ్లుగా వీరి మధ్య సుహృద్భావ వాతావరణం నెలకొన్న వాతావరణం కనిపిస్తోంది. తాజాగా ఈ ఇద్దరు ప్రముఖుల మధ్య రాజీ కుదర్చడానికి తెలంగాణకు చెందిన సీనియర్‌ మంత్రి తుమ్మల నాగేశ్వరరావు ఓ విందు భేటీని నిర్వహించి.. సక్సెస్‌ అయినట్లుగా రాజకీయ వర్గాల్లో గుసగుసలు వినిపిస్తున్నాయి.
నిజం చెప్పాలంటే.. కేసీఆర్‌- రాధాకృష్ణ ఇద్దరూ ఒకప్పట్లో చాలా సన్నిహిత మిత్రులు అని అంతా చెప్పుకుంటూ ఉంటారు. కేసీఆర్‌ను ‘ఒరేయ్‌’ అని పిలిచేంత చనువు కూడా రాధాకృష్ణకు ఉన్నదని అంతా అంటూ ఉంటారు. గతంలో కేసీఆర్‌ ఓపెన్‌ హార్ట్‌ కార్యక్రమం సందర్భంగా కూడా వీరిద్దరి చనువు, దగ్గరితనం అందరి దృష్టికి వచ్చింది. అయితే.. కాలక్రమంలో.. ఇద్దరి మధ్య అంతరం పెరిగింది. ఏబీఎన్‌ ప్రసారాలు తెలంగాణలో రాకుండా ఆగిపోవడం, సుదీర్ఘ కాలం ఆ వ్యవహారంపై రాధాకృష్ణ సుప్రీం కోర్టులో పోరాడి సాధించుకోవడం కూడా జరిగింది. ఆ తర్వాతి నుంచి కేసీఆర్‌ పట్ల రాధాకృష్ణ ధోరణిలో మార్పు వచ్చిందని.. ఆయన రాతలు కాస్త మెత్తబడ్డాయని పలు వ్యాఖ్యలు వినిపిస్తూ వచ్చాయి. దానికి తగ్గట్లుగానే కేసీఆర్‌ చండీయాగం నిర్వహించినప్పుడు రాధాకృష్ణ ఎంచక్కా ఆ కార్యక్రమానికి హాజరయ్యారు. అప్పటినుంచి వీరిద్దరి మధ్య పూర్వపుస్థాయి సయోధ్యను కుదర్చడానికి ప్రయత్నాలు జరుగుతూనే ఉన్నాయిట. తాజాగా కొన్ని రోజుల కిందట తెలుగుదేశం నుంచి తెరాసలోకి జంప్‌ చేసిన.. ఈ ఇద్దరు ప్రముఖులతోనూ చాలా సన్నిహిత సంబంధాలను కలిగి ఉన్న మంత్రి తుమ్మల నాగేశ్వరరావు తన నివాసంలో ఓ అద్భుతమైన విందు భేటీని ఏర్పాటు చేశారుట. అక్కడితో ఇక పాత విషయాలు, పగలు, కక్షలు కార్పణ్యాలు, ఒకరి వెనుక ఒకరు గోతులు తీయడాలు అన్నీ మరచిపోయి.. ముందుకు నడుద్దాం అంటూ ఇద్దరూ ఒక ఒప్పందానికి వచ్చారని సమాచారం. చూడబోతే.. ఒకవైపు చంద్రబాబుతో సత్సంబంధాలు ఏర్పడడం, తెలుగుదేశం విమర్శల్లో తేడా రావడం, చీటికి మాటికి తెరాస సర్కారుపై విరుచుకుపడే ఆంధ్రజ్యోతి అధినేతతో సరికొత్తపాత మైత్రీ బంధం.. ఇవన్నీ కలిపి కేసీఆర్‌కు బంపర్‌ ఆఫర్‌ లాగా కనిపిస్తున్నాయి.
కేసీఆర్‌ – ఆర్‌కె ల మధ్య తుమ్మల దౌత్యం!
