మంత్రివర్గ సమావేశం అంటే… ముఖ్యమంత్రితో పాటు మంత్రులు పాల్గొంటారు. కానీ ముఖ్యమంత్రితో పాటు .. ఒక్క మంత్రి పాల్గొన్న కేబినెట్ సమావేశం … అది కూడా అప్పటి వరకూ ఉన్న పూర్తి స్థాయి కేబినెట్ సమావేశం.. మొదటి సారి జరిగింది. అదే తెలంగాణ మంత్రి వర్గ సమావేశం. నిన్న తెలంగాణ కేబినెట్ భేటీ జరిగింది. కొన్ని కీలక నిర్ణయాలు తీసుకున్నారు. ఈ కేబినెట్ భేటీలో పాల్గొన్నది ముఖ్యమంత్రి కాకుండా.. ఒక్క మంత్రి .. మహమూద్ అలీ మాత్రమే. ఆయన ఎంత కీలక అంశంపై అయినా నోరెత్తే ప్రయత్నం చేయరు. ఎక్కడ సంతకం పెట్టమంటే అక్కడ పెడతారు. దాంతో.. ఇక చర్చకు చాన్స్ లేనట్లే.
ఓ రకంగా తెలంగాణ మంత్రివర్గ భేటీ దేశంలోనే ఒక రికార్డు సృష్టించిందని చెప్పుకోవాలి. కేవలం ఇద్దరు సభ్యులతో మంత్రివర్గ సమావేశం జరగడం చారిత్రకమే. గతంలో ఎన్టీఆర్ మంత్రుల్లేకుండా పదిహేను రోజులకుపైగా… ముఖ్యమంత్రిగా కొనసాగినప్పటికీ… ఆయన కేబినెట్ సమావేశం పేరుతో.. ఎలాంటి భేటీ నిర్వహించలేదు. నిర్ణయాలు తీసుకోలేదు.. కాబట్టి.. ఆ రికార్డ్ ఎన్టీఆర్‌కు లేదు. అసెంబ్లీని రద్దు చేసిన సమయంలో మీడియాలో మాట్లాడినప్పుడు కేసీఆర్ ఎన్టీఆర్ కంటే గొప్పోడినని నిరూపించుకుంటానన్నట్లుగా మాట్లాడారు. ఇతర విషయాల సంగతేమో కానీ… ఒకే ఒక్క మంత్రితో.. నెల రోజులకుపైగా ప్రభుత్వాన్ని నడపడంతో పాటు… కేబినెట్ భేటీ కూడా నిర్వహించి… ఎన్టీఆర్ రికార్డును అధిగమించారనే చెప్పుకోవాలి.
రికార్డుల పరగా చూస్తే.. దేశంలో ఎంత చిన్న రాష్ట్రమైనా సరే… ఇంత వరకూ.. ఒక్క మంత్రితో కేబినెట్ భేటీ జరిగిన దాఖలాల్లేవని చెబుతున్నారు. పదవుల్లో ఉన్న మంత్రులు.. కేబినెట్ సమావేశానికి రావడానికి నిరాకరిస్తే.. అసలు వాయిదాలు వేసుకున్న సందర్భాలు ఉన్నాయి. కానీ ఇక్కడ మాత్రం… మంత్రులు లేవు. ఉన్నదల్లా ఒక్క మంత్రే. అయితే రాజ్యాంగపరంగా… మంత్రి మండలి అంటే.. ఇంత మంది మంత్రులు ఉండాలనే నిబధనల ఏదీ లేదు. కానీ పరిమితి ఉంది. అందుకే.. మంత్రులెవరూ లేనప్పుడు ముఖ్యమంత్రి ఒక్కరే నిర్ణయం తీసుకున్నా..అది మంత్రి మండలి నిర్ణయాల కిందకే వస్తుందంటున్నారు. కాబట్టి… రాజ్యాంగపరంగా కేసీఆర్ కేబినెట్ భేటీ రైటే. కాకపోతే.. కొత్తగా ఉందంతే.. !
