మహేష్ బాబు – సుకుమార్ కాంబినేష‌న్‌లో ఓ సినిమా రావాల్సింది. అనుకోని కార‌ణాల వ‌ల్ల ఆ సినిమా ఆగిపోయింది. అదే క‌థ అల్లు అర్జున్ ద‌గ్గ‌ర‌కు వెళ్లిపోయింది. ఈ ఎపిసోడ్‌ని మహేష్ అభిమానులు అంత తేలిగ్గా మ‌ర్చిపోరు. ఇప్పుడు ఆ టాపిక్ మహేష్ కూడా మ‌ర్చిపోలేద‌ని అర్థ‌మైపోయింది. `మ‌హ‌ర్షి` ప్రీ రిలీజ్ ఫంక్ష‌న్‌లో ఇన్ డైరెక్ట‌ర్‌గా, ఆ మాట‌కొస్తే డైరెక్ట్‌గానే మహేష్ సుకుమార్‌పై సెటైర్ వేసేశాడు. వంశీ పైడిప‌ల్లిని పొగుడుతూ.. పనిలో ప‌నిగా సుకుమార్ చేసిన త‌ప్పుని వేలెత్తి చూపించాడు.
“నా ద‌గ్గ‌ర‌కు వంశీ క‌థ చెప్ప‌డానికి వ‌చ్చిన‌ప్పుడు 20 నిమిషాలు క‌థ విని.. పంపించేద్దాం అనుకున్నా. కానీ క‌థ బాగా న‌చ్చింది. కానీ నా క‌మిట్‌మెంట్స్ నాకున్నాయి. మ‌రో రెండు సినిమాల వరకూ చేయ‌డం కుద‌ర‌దు. అదే విష‌యం చెప్పా. మీ కోసం ఎంత‌కాల‌మైనా ఎదురుచూస్తా అన్నాడు. ఈ రోజుల్లో అలా ఎదురుచూడ‌డం చాలా క‌ష్టం. రెండు నెల‌లు కూడా ఓ హీరో కోసం ఎదురుచూడ‌లేక‌పోతున్నారు. ఆ క‌థ ప‌ట్టుకుని మ‌రో హీరో ద‌గ్గ‌ర‌కు వెళ్లిపోతున్నారు” అంటూ సుకుమార్ ఎపిసోడ్‌ని గుర్తు చేశాడు మహేష్.
మొత్తానికి అంతా మ‌ర్చిపోయిన ఎపిసోడ్ మహేష్ కామెంట్ల వ‌ల్ల మ‌రోసారి పురుడు పోసుకుంది. మ‌రో వారం- ప‌ది రోజుల వరకూ టాలీవుడ్ అంతా మహేష్ కామెంట్లే వినిపించినా ఆశ్చ‌ర్య‌పోవాల్సిన ప‌నిలేదు.
