పెద్ద హీరోల‌తో సినిమా అంటే అంతా హ్యాపీనే అనుకోవాల్సిన ప‌నిలేదు. వాళ్ల‌కుండే క‌ష్టాలు వాళ్ల‌కుంటాయి. మ‌రీ ముఖ్యంగా హీరోయిన్ల‌ని వెదికిప‌ట్టుకోవ‌డం చాలా కష్టం అయిపోతోంది. స్టార్ హీరోల ఇమేజ్‌కి త‌గిన హీరోయిన్లు దొర‌క‌డం లేదు. కొద్ది మంది ఉన్నా – వాళ్లు ముందుకు రావ‌డం లేదు. మ‌రీ ముఖ్యంగా బాలయ్య సినిమా అంటే ఈ స‌మ‌స్య ఎదుర‌వుతూనే ఉంటుంది. అందుకే.. మ‌ధ్యేమార్గంగా దాదాపు కొత్త‌వాళ్ల‌నో, క్రేజ్ లేనివాళ్ల‌నో ఎంచుకుని స‌రిపెట్టుకుంటుంటాడు బాలయ్య. రూల‌ర్‌లో న‌టిస్తున్న వేదిక, సోనాల్ చౌహాన్ అందుకు ఉదాహ‌ర‌ణ.
ఇప్పుడు బాలయ్య సినిమా మ‌ళ్లీ హీరోయిన్ క‌ష్టాలు మొద‌టికి వ‌చ్చాయి. బాల‌కృష్ణ – బోయ‌పాటి శ్రీ‌ను కాంబినేష‌న్‌లో ఓ సినిమా ఇటీవ‌లే క్లాప్ కొట్టుకుంది. త్వ‌ర‌లోనే సెట్స్‌పైకి వెళ్ల‌నుంది. ఇందులో క‌థానాయిక‌గా కీర్తి సురేష్‌ని అనుకున్నారు. క‌థ కూడా వినిపించారు. కానీ కీర్తి సినిమాలో న‌టించ‌డానికి ఆస‌క్తి చూపించ‌డం లేద‌ని తెలుస్తోంది. కాల్షీట్ల స‌మ‌స్య‌వల్లో, మ‌రోటో తెలీదు గానీ కీర్తి ఈ సినిమా చేయ‌డానికి రెడీగా లేద‌ట. దాంతో మ‌రో ఆప్ష‌న్ కోసం వెదుకులాట మొద‌లైంది. దాదాపుగా అగ్ర క‌థానాయిక‌లంద‌రినీ సంప్ర‌దించేశారు. న‌య‌న‌తార ని మ‌రోసారి తీసుకొద్దాం అనే ఆలోచ‌న కూడా ఉంది. అయితే న‌య‌న అంటే దాదాపు 2.5 కోట్లు కావాలి. ఇప్ప‌టికే ఈ సినిమా బ‌డ్జెట్ 70 కోట్లు దాటేసింది. అదీ పేప‌ర్ పైన. చివ‌రికి ఎంత తేలుతుందో తెలీదు. ఇప్పుడు హీరోయిన్ కోసం మ‌ళ్లీ కొన్ని కోట్లు తీసుకురావాలంటే కష్టం. సో.. న‌య‌న‌తార కంటే.. కాస్త బెట‌ర్ ఆప్ష‌న్ కోసం బోయ‌పాటి శ్రీ‌ను ప్ర‌య‌త్నిస్తున్నాడు.
