నీదీ నాదీ ఒకే క‌థ‌తో ఆక‌ట్టుకున్న ద‌ర్శ‌కుడు వేణు ఉడుగుల. ఆ సినిమా విమ‌ర్శ‌కుల ప్ర‌శంస‌లు అందుకుంది. క‌మ‌ర్షియ‌ల్ గానూ ఓకే. అందుకే… `విరాట‌ప‌ర్వం` ఛాన్సొచ్చింది. న‌క్స‌ల్ నేప‌థ్యంలో సాగే క‌థ ఇది. ప్రియ‌మ‌ణి ఓ కీల‌క‌మైన పాత్ర పోషిస్తోంది. ఈ రోజు ప్రియ‌మ‌ణి పుట్టిన రోజు సంద‌ర్భంగా ఈ చిత్రంలోని ఆమె లుక్‌ని బ‌య‌ట‌కు వ‌దిలింది చిత్రబృందం. కామ్రేడ్ భార‌త‌క్క పాత్ర‌లో ప్రియ‌మ‌ణి క‌నిపించ‌బోతోంది. న‌క్స‌లైట్ గా ప్రియ‌మ‌ణి లుక్ ఇంప్రెస్‌చేసేలానే క‌నిపిస్తోంది. ఈ పాత్ర కోసం ట‌బుని అనుకున్నారు. ఆమె కాల్షీట్లు కుద‌ర‌క‌పోవ‌డం వ‌ల్ల ప్రియ‌మ‌ణిని ఎంచుకున్నారు. జాతీయ ఉత్త‌మ‌న‌టిగా ఘ‌న‌త సాధించిన ప్రియ‌మ‌ణి ఖాతాలో మరో మంచి పాత్ర ప‌డిన‌ట్టే. రానా, సాయి ప‌ల్ల‌వి జంట‌గా న‌టిస్తున్న ఈ చిత్రానికి సుధాక‌ర్ చెరుకూరి నిర్మాత. న‌క్స‌ల్ నేప‌థ్యంలో సాగినా, ప్రేమ‌క‌థ‌కీ స్థానం ఉంద‌ని, వాటికి సంబంధించిన స‌న్నివేశాలు హృద‌యానికి హ‌త్తుకునేలా ఉంటాయ‌ని చిత్రబృందం చెబుతోంది.
