రైతులకు సున్నా వడ్డీ పథకం కింద.. సీఎం జగన్ రూ. 128 కోట్లను .. దాదాపుగా ఆరు లక్షల మంది రైతుల ఖాతాల్లో జమ చేయనున్నారు. సగటున ఒక్కో రైతుకు రూ. రెండు వేల రూపాయలు మాత్రమే దక్కబోతున్నాయి. రూ. లక్ష లోపు రుణాలు తీసుకుని సకాలంలో తిరిగి చెల్లించిన రైతులకు మాత్రమే.. వారు కట్టిన వడ్డీని వెనక్కి ఇవ్వబోతున్నారు. సకాలం అంటే.. ఏడాది లోపే. బ్యాంక్‌లో అగ్రి లోన్.. రూ. లక్ష తీసుకుంటే.. ఏటా వడ్డీ రూ. వెయ్యికూడా అవ్వదు. రైతులు సమయానికి చెల్లింపులు చేయడం చాలా కష్టం. అది తెలిసి కూడా..అనేకానేక నిబంధనలు పెట్టి.. చివరికి.. లబ్దిదారుల సంఖ్యను కుదించింది. ఈ సున్నా వడ్డీ పథకంపై అసెంబ్లీలో జగన్ చెప్పిన మాటల్ని ఇప్పుడు గుర్తు చేసుకోవచ్చు.
ప్రభుత్వం మారిన కొత్తలో సున్నా వడ్డీకి ఏపీ ప్రభుత్వం ఒక్క రూపాయికూడా ఇవ్వలేదని జగన్ ఆరోపించారు. అప్పుడు ఐదేళ్లలో చంద్రబాబు సర్కార్… సున్నా వడ్డీ కోసం.. రూ. 630 కోట్ల రూపాయలను మాత్రమే చెల్లించిందని రికార్డులు బయటకు వచ్చాయి. అప్పుడు సీఎం జగన్ సున్నా వడ్డీ కోసం చెల్లించాల్సింది రూ. 11600 కోట్లు అని.. ప్రకటించారు. టీడీపీ ప్రభుత్వం ఐదు శాతమే ఇచ్చిందని… తమ ప్రభుత్వం రైతుల్ని అలా మోసం చేయదని చెప్పుకొచ్చారు. రైతులకు సున్నా వడ్డీ పథకం.. కిరణ్ కుమార్ రెడ్డి హయాంలో.. ప్రారంభమయింది. అప్పట్లో రూ. లక్ష వరకూ రుణాలకు వర్తింప చేశారు. టీడీపీ హయాంలో దీన్ని రూ. మూడు లక్షలకు పెంచారు.
జగన్ సర్కార్ కూడా.. మూడు లక్షల వరకూ కొనసాగిస్తుందని రైతులు అనుకున్నారు. కానీ ఇప్పుడు సీఎంజగన్ లక్ష వరకే వర్తింప చేసి నిధులు మంజూరు చేస్తున్నారు. సున్నా వడ్డీ రుణాలకు.. ఏడాదికి రూ. రెండు వేల కోట్లకుపైగా అవుతాయని అసెంబ్లీలోనే జగన్ తేల్చి చెప్పారు. కానీ విడుదల చేస్తోంది మాత్రం… రూ. వంద కోట్లకు అటూఇటుగా. రైతుల్ని సున్నా వడ్డీ పేరుతో జగన్ సర్కార్.. మాయ చేసిందని.. ప్రభుత్వం ఏర్పడినప్పటి నుండి సున్నా వడ్డీ విషయంలో చేస్తున్న పరిణామాలు గమనిస్తే అర్థమవుతుంది. అయితే… ఇచ్చే రూ. 120 కోట్లకే..ఐదారు కోట్లు పెట్టి ప్రచారం చేసుకోవడం ఇందులో కొసమెరుపు.
