డిసెంబ‌రులో పెద్ద సినిమాల జాత‌ర రాబోతోంది. అఖండ‌తో డిసెంబ‌రు జోరు మొద‌లు కాబోతోంది. డిసెంబ‌రు 17న పుష్ప, ఆ త‌ర‌వాత శ్యాం సింగ‌రాయ్ రాబోతున్నాయి. అయితే పుష్ప రిలీజ్‌కొంచెం క‌ష్ట‌మ‌ని, డేట్ మారే అవ‌కాశాలున్నాయ‌ని వార్త‌లు వినిపిస్తున్నాయి. పుష్ప‌కి సంబంధించిన వ‌ర్క్ ఇంకా పెండింగ్‌లో ఉంద‌ని, ఈ ద‌శ‌లో రిలీజ్ కావ‌డం అంత తేలిక కాద‌ని ఫిల్మ్‌న‌గ‌ర్‌లో గుస‌గుస‌లు మొద‌ల‌య్యాయి. అయితే… రిలీజ్ డేట్ విష‌యంలో త‌గ్గేదే లే అంటోంది పుష్ప టీమ్. తాజాగా ఓ కొత్త పోస్ట‌ర్ విడుద‌ల చేసింది. ట్రైల‌ర్ ఎప్పుడొచ్చేది.. సోమ‌వారం చెబుతామ‌ని ప్ర‌క‌టించింది. ఆ పోస్ట‌ర్‌లో డిసెంబ‌రు 17న రిలీజ్ కాబోతోంద‌ని మ‌ళ్లీ గ‌ట్టిగా పునః ప్ర‌క‌ట‌న చేసింది.
ఈ సినిమాని అనుకున్న స‌మ‌యానికి విడుద‌ల చేయాల‌ని చిత్ర‌బృందం అంతా అహ‌ర్నిశ‌లూ క‌ష్ట‌ప‌డుతోంది. ఓ వైపు చెన్నైలో రీ రికార్గింగ్ జ‌రుగుతోంది. ఎడిటింగ్ వ‌ర్క్ కొన‌సాగుతోంది. బ‌న్నీ కూడా `ఎట్టి ప‌రిస్థితుల్లోనూ డిసెంబ‌రు 17నే ఈ సినిమా రావాలి` అని ప‌ట్టుబ‌డుతున్నాడ‌ట. అందుకే టీమ్ అంతా రాత్రింబ‌వ‌ళ్లూ శ్ర‌మిస్తోంది. ట్రైల‌ర్ ని కూడా పూర్తి చేసి వ‌దులుతున్నారంటే.. డిసెంబ‌రు 17న రావ‌డం ప‌క్కా అన్న‌మాట.
