సీక్వెల్ క‌థ రాసుకోవ‌డం కూడా… ఓ ర‌క‌మైన స‌వాలే. సూప‌ర్ హిట్ కి సీక్వెల్ అంటూ ఓ క‌థ‌ని ప‌ట్టాలెక్కించ‌డం తేలికే కానీ, దాన్ని జ‌న‌రంజ‌కంగా తీసి, మెప్పించ‌డం మాత్రం చాలా క‌ష్టం. రాజ‌మౌళి ఇప్ప‌టి వ‌ర‌కూ సీక్వెల్ జోలికి పోలేదు. కాక‌పోతే… విజయేంద్ర ప్ర‌సాద్ మాత్రం కొన్ని సీక్వెల్ క‌థ‌లు కొన్ని అల్లుకుంటున్నాడు. విక్ర‌మార్కుడు 2 ప్ర‌స్తుతం చ‌ర్చ‌ల్లో వుంది. ఈ సినిమాకి ద‌ర్వ‌కుడు మాత్రం… రాజ‌మౌళి కాదు. అలానే… ‘ఆర్.ఆర్.ఆర్’కీ సీక్వెల్ ఉంద‌ట.
అల్లూరి సీతారామ‌రాజు, కొమ‌రం భీమ్ లు యేడాది పాటు… ఇంటికి దూరంగా గ‌డిపారు. వారిద్ద‌రూ అనుకోని ప‌రిస్థితుల్లో క‌లిసి, స్నేహం చేస్తే ఏమవుతుంద‌న్న అంద‌మైన ఊహ‌తో `ఆర్.ఆర్.ఆర్`కి బీజం ప‌డింది. నిజానికి చ‌రిత్ర‌లో ఇలా జ‌ర‌గ‌లేదు. కేవ‌లం విజయేంద్ర ప్ర‌సాద్ ఫాంట‌సీ మాత్ర‌మే. అల్లూరి, కొమ‌రం వారి వారి దారుల్లో స్వాతంత్ర్య సంగ్రామంలో పాల్గొన‌డానికి బ‌య‌ల్దేర‌డంతో ఆర్.ఆర్.ఆర్…క‌థ ముగుస్తుంది.
ఆర్.ఆర్.ఆర్ 2 విష‌యానికొస్తే.. అల్లూరి, కొమ‌రం స్వాతంత్ర్య సంగ్రామంలో ఏం చేశార‌న్న‌ది క‌థ అవుతుంది. ఆ ద‌శ‌లో కూడా ఇద్ద‌రూ క‌లిసిన‌ట్టు చూపించాల‌న్న‌ది ఆలోచ‌న. అయితే ఈ ఊహ కేవ‌లం పైప్ లైన్ లోనే ఉంది. `బాహుబ‌లి 2`కి కొన‌సాగింపుగా నెట్ ఫ్లిక్స్ కోసం ఓ స్క్రిప్టు త‌యారు చేశారు. అయితే… అది అనివార్య కార‌ణాల వ‌ల్ల ఆగిపోయింది. `ఆర్.ఆర్.ఆర్ 2` ఉంటే… దాన్ని ఓటీటీకి ఇద్దామ‌న్న ఆలోచ‌న వుంది. `విక్ర‌మార్కుడు 2`లానే దీన్ని విజ‌యేంద్ర‌ప్ర‌సాద్ మ‌రో ద‌ర్శ‌కుడికి అప్ప‌గిస్తార్ట. మ‌రి భ‌విష్య‌త్తులో ఏం జ‌రుగుతుందో చూడాలి.
