ఉప్పెన‌తో సూప‌ర్ హిట్టు కొట్టాడు బుచ్చిబాబు. అయితే ఆ త‌ర‌వాతి సినిమాని ప‌ట్టాలెక్కించ‌డానికి చాలా స‌మ‌య‌మే తీసుకొన్నాడు. ఎన్టీఆర్ తో బుచ్చి సినిమా ఉంటుంద‌ని ప్రచారం జ‌రిగింది. `పెద్ది` అనే క‌థ రెడీ చేశాడ‌ని కూడా అన్నారు. అయితే ఆ ప్రాజెక్టు… ముందుకు క‌ద‌ల్లేదు. ఎన్టీఆర్ కొర‌టాల శివ సినిమాని ఓకే చేయ‌డం వ‌ల్ల… బుచ్చి బాబు క‌థ‌ని ప‌క్క‌న పెట్టాల్సివ‌చ్చింది. అయితే.. ఆ త‌ర‌వాత బుచ్చి.. చ‌ర‌ణ్‌కి ట‌చ్‌లోకి వెళ్లాడు. రామ్ చ‌ర‌ణ్‌తో బుచ్చిబాబు సినిమా చేస్తాడ‌న్న ప్రచారం ఈమ‌ధ్య ఊపందుకొంది. అయితే ఇది కూడా ఉంటుందా, లేదా? అనే అనుమానం కొంద‌రిలో వ్య‌క్త‌మయ్యింది.
ఎట్ట‌కేల‌కు ఈ సినిమాపై అధికారిక ప్ర‌క‌ట‌న వ‌చ్చేసింది. చరణ్ – బుచ్చిబాబుల కాంబినేష‌న్‌కి ఖ‌రారు చేస్తూ మైత్రీ మూవీస్ సంస్థ అధికారిక ప్ర‌క‌ట‌న విడుద‌ల చేసింది. ఈ ప్రాజెక్టులో సుకుమార్ కూడా భాగం కానున్నాడు. ఉప్పెన‌లోనూ సుకుమార్ హ్యాండ్ ఉన్న సంగ‌తి తెలిసిందే. మ‌రోసారి.. మైత్రీ-సుకుమార్ – బుచ్చిబాబు కాంబో సెట్ట‌య్యింది. అధికారిక ప్ర‌క‌ట‌న వ‌చ్చేసింది కాబ‌ట్టి.. ఇక బుచ్చి రిలాక్స్ అయిపోవొచ్చు. ఎన్టీఆర్ క‌థ‌నే కాస్త అటూ ఇటూ చేసి, చ‌ర‌ణ్‌కి సెట్ చేశాడా, లేదంటే చరణ్ కోసం కొత్త క‌థ రాసుకొన్నాడా? అనేది తెలియాలంటే ఇంకొంత కాలం ఆగాలి.
