టాలీవుడ్ లో మ‌రో ఆస‌క్తిక‌ర‌మైన కాంబినేష‌న్ ని సెట్స్‌పైకి తీసుకెళ్ల‌డానికి స‌న్నాహాలు జ‌రుగుతున్నాయి. ఈసారి ప్ర‌భాస్ – సుకుమార్ క‌లిసి ప‌ని చేయ‌బోతున్నార‌న్న‌ది ఇన్ సైడ్ వ‌ర్గాల టాక్‌. నిజంగానే ఇది క్రేజీ కాంబో. వీరిద్ద‌రూ క‌లిస్తే – బాక్సాఫీసు ద‌ద్ద‌రిల్ల‌డం ఖాయం. ఎప్ప‌టి నుంచో ఈ కాంబో గురించిన లీకులు వ‌స్తూనే ఉన్నాయి. కానీ ప్ర‌భాస్ బిజీ వ‌ల్ల‌, సుకుమార్ తో ప్రాజెక్ట్ ముందుకు వెళ్ల‌లేక‌పోయింది. ఈసారి మాత్రం వీరిద్ద‌రి కాంబోలో సినిమా రావ‌డం ఖాయం అంటున్నారు. ప్ర‌ముఖ నిర్మాత దిల్ రాజు ముంద‌డుగు వేసి, వీరిద్ద‌రి క‌ల‌యిక‌లో సినిమా ప్లాన్ చేయ‌డానికి త‌న వంతు ప్ర‌య‌త్నాలు ముమ్మ‌రం చేశార‌ని స‌మాచారం. సుకుమార్ ప్ర‌స్తుతం రామ్ చర‌ణ్ కోసం ఓ స్క్రిప్టు సిద్ధం చేస్తున్నారు. ఆ ప్రాజెక్ట్ అయ్యాక ‘పుష్ప 3’ ఉండాలి. కానీ పుష్ప 3ని ప‌క్క‌న పెట్టి, ప్ర‌భాస్ తోనే సుకుమార్ సినిమా చేసే అవ‌కాశం ఉంద‌ని ఇన్ సైడ్ వ‌ర్గాలు చెబుతున్నాయి.

ప్ర‌భాస్ చేతిలో ఫౌజీ ఉంది. రాజాసాబ్ ప‌ని దాదాపుగా పూర్తికావొచ్చింది. ఆ త‌ర‌వాత స్పిరిట్ ప‌ట్టాలెక్కిస్తారు. ‘క‌ల్కి2’, ‘బ్ర‌హ్మ‌రాక్ష‌స్’ సినిమాలు ప్ర‌భాస్ పూర్తి చేయాల్సివుంది. ఇవ‌న్నీ ఎప్ప‌టికి పూర్త‌వుతాయో తెలీదు. కానీ ప్ర‌భాస్ ఒకేసారి రెండు సినిమాలు చేయ‌డానికి రెడీ. కాబట్టి మ‌ధ్య‌లో సుకుమార్ సినిమాని ప‌ట్టాలెక్కించినా ఆశ్చర్య‌పోవాల్సిన ప‌నిలేదు. ‘స్పిరిట్‌’ ని ఏక బిగిన అవ్వ‌గొట్టి ‘క‌ల్కి 2,’ ‘బ్ర‌హ్మ‌రాక్ష‌స్‌’ సినిమాలు మొద‌లెడ‌తాడు. ఆ లోగా సుకుమార్ – రామ్ చ‌ర‌ణ్ ప్రాజెక్ట్ పూర్తి అవుతుంది. సుకుమార్ ఎలాగూ క‌థ రాసుకోవ‌డానికి కొంత టైమ్ తీసుకొంటాడు కాబ‌ట్టి.. చర‌ణ్ సినిమా త‌ర‌వాత‌.. ప్ర‌భాస్ తో ప్రొసీడ్ అవ్వ‌డానికి ఎలాంటి ఆటంకం లేన‌ట్టే.

సుకుమార్ కి ఓ హెవీ యాక్ష‌న్ సినిమా చేయాల‌ని ఆశ‌. హాలీవుడ్ త‌ర‌హాలో ఓ ఫుల్ లెంగ్త్ యాక్ష‌న్ సినిమా చేయాల‌ని అనుకొంటున్నారు. అది ప్ర‌భాస్ తో తీరే అవ‌కాశం ఉంది.