హైదరాబాద్‌లో ఓ ఎస్ఐ అయ్యప్ప దీక్ష తీసుకున్నారు. యూనిఫాంలో ఉద్యోగానికి రావడం లేదు. అందుకే పై అధికారి సెలవు తీసుకోవాలని సలహా ఇచ్చారు. అది అంతర్గత సమాచారం. అయినా ఆ లేఖ బయటకు వచ్చింది. అంతే ఇక రాజకీయం ప్రారంభమయింది. అయ్యప్ప భక్తుల్ని అవమానించారని .. హిందూత్వాన్ని కించ పరుస్తున్నారని పోలీసు వ్యవస్థపైనే దండెత్తారు. ఏకంగా డీజీపీ ఆఫీసును ముట్టడించడం ఈ రాజకీయానికి పరాకాష్ట.
పోలీసుల రూల్స్ పోలీసులవి !
వ్యవస్తలు బలంగా ఉండాలంటే.. వారు పాటించే రూల్స్ ను పక్కాగా పాటించడం వల్లనే సాధ్యం. ముఖ్యంగా లా అండ్ ఆర్డర్ చూడాల్సిన పోలీసు వ్యవస్థకు పక్కా రూల్స్ ఉంటాయి. వాటిని పాటించాల్సిందే. పోలీసులు అంటేనే ఖాకీ యూనిఫాం. అది యూనిఫాం సర్వీస్. అలాంటి చోట్ల యూనిఫాం లేకుండా.. డ్యూటీ చేయడం నిబంధనలకు విరుద్ధమే అవుతుంది. అయ్యప్ప మాల వేసుకోవడం వ్యక్తిగత అంశం. పోలీసు వ్యవస్థ దీక్ష తీసుకోవద్దని చెప్పలేదు. కానీ సెలవు పెట్టుకోవాలని సలహా ఇచ్చారు. ఇందులో తప్పు లేదు. కానీ పోలీసు వ్యవస్థపై దాడి ప్రారంభించారు.
పోలీసులు అధికార పార్టీకి చెందరు.. ప్రభుత్వంలో భాగం
ప్రభుత్వంపై హిందూ వ్యతిరేక ముద్ర వేయడానికి కొంత మంది ఈ ఉదంతాన్ని వాడుకున్నారు. ఎప్పుడు అయ్యప్పల సీజన్ వచ్చినా ఇలాంటివి జరుగుతూనే ఉంటాయి. స్కూల్ నుంచి పోలీసు వ్యవస్థ వరకూ ఇలాంటివి ఉంటాయి. వివాదం రేపుతూనే ఉంటారు. నిజానికి దేవుడంటే భక్తి ఉన్నవారు.. నిష్టతో స్వామివారి దీక్ష చేస్తున్నప్పుడు ఇలాంటి రాజకీయాలు, ధర్నాలు, ముట్టడులు చేయకూడదు. నిష్కల్మషమైన మనసుతో దేవుడినే ధ్యానం చేయాలి. కానీ ఇలా లేనిపోని రాజకీయాలు చేయకూడదు. దురదృష్టవశాత్తూ అదే జరుగుతోంది.
అయ్యప్పలూ.. ఆలోచించాలి.. రాజకీయాల్లో భాగం కాకూడదు !
అయ్యప్ప స్వామి దీక్షాధారణ చేయడం తెలుగు రాష్ట్రాల్లో పెరుగుతోంది. నవంబర్ , డిసెంబర్ సీజన్ లో ఎక్కడ చూసినా పడిపూజలు చేస్తూ భక్తులు కనిపిస్తారు. అయితే ఎక్కువగారాజకీయ జోక్యం ఉండటమే సమస్యలకు కారణం అవుతోంది. మత పరమైన భావోద్వేగాలను రెచ్చగొట్టాడనికి స్వాముల్ని రాజకీయ నేతలు ప్రయత్నిస్తూంటారు. వారి ట్రాప్‌లో పడితే.. అయ్యప్పను సేవించడం కన్నా.. వారి కుట్రల్లో భాగమవడం ఎక్కువ అవుతుంది.
