జగన్మోహన్ రెడ్డి చేసి పోయిన అప్పులు, చేసిన వ్యవస్థల విధ్వంసం చూసిన వారికి టీడీపీ ప్రభుత్వం ఎంతో కాలం ఆర్థికంగా నిలబడలేదని కుప్పకూలిపోతుందని అనుకున్నారు. కానీ చంద్రబాబు వ్యవస్థల్ని సరిదిద్దుతూ.. పక్కాగా ఎన్నికల హామీలను నెరవేరుస్తూ ముందుకుసాగుతున్నారు. అదే సమయంలో అభివృద్ధి కూడా ఆగడం లేదు. కేంద్రం నుంచిపెద్ద ఎత్తున ప్రాజెక్టులు వస్తున్నాయి. కేంద్ర కేబినెట్ సమావేశం అయిన ప్రతీ సారి ఏపీకి ఓ ప్రాజెక్టు ప్రకటిస్తున్నారు. డబుల్ ఇంజిన్ సర్కార్ బలం వల్ల ఏపీ మెల్లగా కోలుకుంటోంది.
కేంద్రం నుంచి ఏపీకి భారీగా సాయం
ఆంధ్రప్రదేశ్ ఆర్థిక వ్యవస్థకు ఊపిరిపోసే రాజధాని అమరావతి నిర్మాణానికి కేంద్ర ప్రభుత్వం భారీ ఆర్థిక ప్యాకేజీని ప్రకటించింది. గత బడ్జెట్ , ఇటీవలి కేబినెట్ నిర్ణయాల ద్వారా అమరావతి అభివృద్ధి కోసం రూ. 15,000 కోట్ల ప్రత్యేక సహాయాన్ని మంజూరు చేసింది. రాష్ట్రం ఆర్థిక ఇబ్బందుల్లో ఉన్నప్పటికీ, రాజధాని నిర్మాణ పనులు వేగవంతం చేయడానికి ఈ నిధులు కీలకమయ్యాయి. కేవలం నిధులే కాకుండా, అమరావతిని అనుసంధానించేలా రూ. 2,047 కోట్ల వ్యయంతో ఎర్రుపాలెం-అమరావతి-నంబూరు రైల్వే లైన్ వంటి ప్రతిష్టాత్మక ప్రాజెక్టులను కూడా కేంద్రం చేపట్టింది.
ఏడాదిలో ఏపీ రైల్వే ప్రాజెక్టులకు రూ.70 వేల కోట్లు
రవాణా పారిశ్రామిక రంగాన్ని బలోపేతం చేసే దిశగా ఆంధ్రప్రదేశ్కు రైల్వే శాఖ నుంచి భారీ కేటాయింపులు అందాయి. ముఖ్యంగా ఈ ఏప్రిల్ 2026లో కేంద్ర కేబినెట్ రూ. 9,889 కోట్లు వ్యయంతో నిడదవోలు-దువ్వాడ మధ్య మూడవ , నాలుగవ రైల్వే లైన్ల నిర్మాణానికి ఆమోదం తెలిపింది. ఇది విశాఖపట్నం, కాకినాడ వంటి పోర్టులకు సరకు రవాణాను సులభతరం చేయడమే కాకుండా, పారిశ్రామికంగా రాష్ట్రం దూసుకుపోవడానికి తోడ్పడుతుంది. గత ఏడాది కాలంలో రాష్ట్రవ్యాప్తంగా సుమారు 39 రైల్వే ప్రాజెక్టులకు రూ. 70,000 కోట్లపైగా నిధులను కేంద్రం కేటాయించడం గమనార్హం.
పోలవరం , సాగునీటి ప్రాజెక్టులకు దన్ను
రాష్ట్ర జీవనాడి అయిన పోలవరం ప్రాజెక్టు విషయంలో కేంద్ర ప్రభుత్వం మునుపెన్నడూ లేని విధంగా సహకారాన్ని అందిస్తోంది. గడిచిన కాలంలో పోలవరం పనుల కోసం దాదాపు రూ. 18,000 కోట్ల వరకు నిధులు మంజూరు చేసింది. అలాగే, వెలిగొండ వంటి కీలక ప్రాజెక్టులను సకాలంలో పూర్తి చేయడానికి అవసరమైన సాంకేతిక, ఆర్థిక మద్దతును కేంద్రం అందిస్తోంది. డబుల్ ఇంజిన్ సర్కార్ వల్ల ఇరు ప్రభుత్వాల మధ్య సమన్వయం పెరిగి, నీటి పారుదల ప్రాజెక్టుల్లో ఉన్న అడ్డంకులు ఒక్కొక్కటిగా తొలగుతున్నాయి.
పారిశ్రామిక కారిడార్లు , బ్లూ ఎకానమీ
ఆంధ్రప్రదేశ్ సుదీర్ఘ తీరప్రాంతాన్ని వినియోగించుకుని రాష్ట్రాన్ని ఎగుమతుల హబ్గా మార్చేందుకు కేంద్రం బ్లూ ఎకానమీ మిషన్ కింద ప్రత్యేక ప్రాధాన్యత ఇస్తోంది. మత్స్య సంపద నిల్వ కేంద్రాలు, కోల్డ్ చైన్ నెట్వర్క్ల అభివృద్ధికి కేంద్ర బడ్జెట్ 2026-27లో భారీ నిధులు కేటాయించింది. దీనికి తోడు, వైజాగ్ ఐటీ హబ్, డేటా సెంటర్లు , గ్రీన్ హైడ్రోజన్ ప్రాజెక్టులకు కేంద్రం ఇచ్చే ప్రోత్సాహకాలు రాష్ట్ర పారిశ్రామిక ముఖచిత్రాన్ని మారుస్తున్నాయి. ఆర్థికంగా వెనుకబడినప్పటికీ, కేంద్రం ఇచ్చే 50 ఏళ్ల వడ్డీ లేని రుణాల కింద ఏపీకి పెద్ద ఎత్తున వాటా దక్కుతుండటం రాష్ట్రానికి కొండంత అండగా మారింది.
గతంలో కేంద్ర-రాష్ట్రాల మధ్య ఉన్న ఘర్షణ వాతావరణం ఇప్పుడు సహకారం వైపు మళ్లిందని ఈ ప్రాజెక్టుల వరవడిని చూస్తే అర్థమవుతుంది. ప్రతి కేబినెట్ భేటీలోనూ ఏపీకి సంబంధించిన ఏదో ఒక ప్రాజెక్టు ఆమోదం పొందడం, నిధుల విడుదల జరుగుతోంది. రాష్ట్రంలో ఆర్థిక సంక్షోభం ఉన్నా, కేంద్రం అండగా నిలవడంతో అభివృద్ధి పనులు ఆగిపోకుండా సాగుతున్నాయి. ఇదే డబుల్ ఇంజిన్ సర్కార్ వల్ల కలిగే అసలైన ప్రయోజనం.
