గేటెడ్ కమ్యూనిటీల్లో ఇల్లు కొనేటప్పుడు చాలా మంది కేవలం బ్యాంకు లోన్ , నెలవారీ చెల్లించాల్సిన ఈఎంఐ లెక్కలతోనే సరిపెట్టుకుంటారు. కానీ, వాస్తవానికి ఒక విలాసవంతమైన కమ్యూనిటీలో నివసించడం అంటే కేవలం ఇంటి అద్దె లేదా ఈఎంఐతో ముగిసిపోయే వ్యవహారం కాదు. ప్రతి నెలా చెల్లించాల్సిన మెయింటెనెన్స్ ఛార్జీలు మీ ఆర్థిక ప్రణాళికను తలకిందులు చేసే అవకాశం ఉంది. అందుకే ఇల్లు కొనే ముందే ఈ అదనపు భారం గురించి లోతుగా విశ్లేషించుకోవాలి.

పెద్ద గేటెడ్ కమ్యూనిటీల్లో లభించే క్లబ్ హౌస్, స్విమ్మింగ్ పూల్, ఆధునిక జిమ్, పార్కులు , 24/7 సెక్యూరిటీ వంటి సదుపాయాలు వినడానికి చాలా బాగుంటాయి. అయితే ఈ సౌకర్యాల నిర్వహణకు భారీగా ఖర్చవుతుంది. లిఫ్టుల నిర్వహణ, కామన్ ఏరియా లైటింగ్, గార్డెనింగ్ , వాటర్ ట్రీట్‌మెంట్ ప్లాంట్ల కోసం అయ్యే ఖర్చును ఫ్లాట్ యజమానులందరూ కలిసి పంచుకోవాల్సి ఉంటుంది. కొన్ని ప్రతిష్టాత్మక ప్రాజెక్టుల్లో ఈ మెయింటెనెన్స్ ఛార్జీలు నెలకు రూ. 5,000 నుండి రూ. 10,000 వరకు, లేదా అంతకంటే ఎక్కువే ఉండవచ్చు.

ఈ ఖర్చు మీ నెలవారీ బడ్జెట్‌పై తీవ్ర ప్రభావం చూపుతుంది. మీరు చెల్లించే ఈఎంఐ రూ. 50,000 అనుకుంటే, దానికి అదనంగా మరో రూ. 10,000 మెయింటెనెన్స్ రూపంలో చెల్లించడం అంటే మీ నెలవారీ ఖర్చు 20 శాతం పెరిగినట్లే. మీరు ఆ సదుపాయాలను వాడినా వాడకపోయినా, ఈ మొత్తాన్ని ఖచ్చితంగా చెల్లించాల్సి ఉంటుంది. ఒకవేళ ఇల్లు అద్దెకు ఇవ్వాలనుకున్నా, అధిక మెయింటెనెన్స్ వల్ల ఆశించిన స్థాయిలో అద్దె రాకపోవచ్చు లేదా అద్దెకు ఉండేవారు ముందుకు రాకపోవచ్చు.

ఇల్లు కొనేముందే బిల్డర్‌ను లేదా అక్కడి అసోసియేషన్‌ను అడిగి చదరపు అడుగుకు ఎంత మెయింటెనెన్స్ వసూలు చేస్తున్నారో స్పష్టత తెచ్చుకోవాలి. అలాగే ప్రతి ఏటా ఈ ఛార్జీలు ఎంత శాతం పెరిగే అవకాశం ఉందో కూడా అంచనా వేయాలి. కేవలం ఇంటి అందాన్ని చూసి మాత్రమే కాకుండా, దాన్ని మెయింటైన్ చేయడానికి అయ్యే స్తోమత మనకు ఉందా లేదా అని ఆలోచించినప్పుడే ఆ ఇల్లు మనకు నిజమైన ఆస్తిగా మారుతుంది.