తెలుగుదేశం పార్టీ మీద నిర్ణయాల విషయంలో చంద్రబాబునాయుడు ఫైనల్‌. ఇందులో ఎవ్వరికీ ఎలాంటి సందేహమూ లేదు. అయినంత మాత్రాన, ఆయన మాట తిరుగులేని ఆదేశంలాగా చెల్లుబాటు అయ్యే పరిస్థితి ఆ పార్టీలో ఉన్నదా? ఏపీలో ఆయన రాజ్యం చేస్తున్నారు గనుక, సీఎం పదవిలో ఉన్నారు గనుక.. ఆయన మాటకు పార్టీలో ప్రతి ఒక్కరూ విలువ ఇస్తూ ఉండవచ్చు. అదే తెలంగాణ విషయానికి వస్తే.. కార్యకర్తలు శ్రేణులు అధినేత మాటకు అంతే విలువ ఇచ్చే పరిస్థితి ఉన్నదా? ఈ విషయం కాస్త సందేహమే. అలాంటి సందేహాలే.. ఇప్పుడు గ్రేటర్‌ పరిధిలో బరిలో ఉన్న భాజపా నాయకులకు కూడా భయాన్ని పుట్టిస్తున్నాయి.
తెదేపా- భాజపా గ్రేటర్‌ పరిధిలో కలిసే పోటీచేస్తున్న సంగతి అందరికీ తెలుసు. నిజానికి తెదేపా చాలా బలంగా ఉండే కొన్ని డివిజన్లను కూడా భాజపాకు కేటాయించారు. అయితే.. ఇలాంటి చోట్ల తెదేపా సపోర్ట్‌ ఉంటే తప్ప కమలదళం గెలవడం కష్టం. కానీ అన్ని చోట్ల వారికి సమానంగా తెదేపా వారి మద్దతు లభించడం లేదు. అందుకే చంద్రబాబునాయుడు హైదరాబాదులో ఉన్న ఈ రెండు రోజుల్లోనే డివిజన్ల పార్టీ ఇన్చార్జుల టెలికాన్ఫరెన్స్‌ సమావేశం కూడా పెట్టుకుని.. భాజపా నాయకుల ప్రశంసలు పొందేలాగా తెదేపా శ్రేణులు పనిచేసి వారిని గెలిపించాలంటూ హితవు చెబుతున్నారు.
అయితే ఈ హితవాక్యాలను చెవికి ఎక్కించుకునేది ఎవరు? ఒకసారి తమ డివిజన్‌లో భాజపాను గెలిపిస్తే.. ఇక తమ రాజకీయ కెరీర్‌కు శాశ్వతంగా సీలింగ్‌ వేసుకోవడమే అనే భయం ప్రతిచోటా ప్రతి ఒక్కరికీ ఉంటుంది. మరి అలాంటి నేతలు చంద్రబాబు మాట ఖాతరు చేస్తారా? లోలోపల భాజపా వెనుకగోతులు తీయకుండా ఉంటారా? అనేది ఫలితాలు వచ్చాక గానీ తేలదు. ఇలాంటి సంక్లిష్ట సమయాల్లో పార్టీ శ్రేణులను జోకొట్టి వారితో సానుకూల దృక్పథంతో పనిచేయించడానికి అనుసరించాల్సిన వ్యూహాలు వేరు. కేవలం టెలికాన్ఫరెన్స్‌లో ఇవి తీరుతాయా అనేది విశ్లేషకుల అనుమానం. కనీసం నేరులో అయినా డివిజన్‌ ఇన్చార్జుల సమావేశం పెట్టి ఉంటే.. అందరూ తమ తమ గోడు అధినేతతో చెప్పుకుని, తమకు తగిన హామీలు పొంది.. ఆ నమ్మకంతో ప్రచారంలో చురుగ్గా ఉండే అవకాశం ఉండేది కదా అని పలువురు భావిస్తున్నారు.
