పవన్ కళ్యాణ్ ‘ఓజీ’ ప్రీమియర్ టికెట్లు అన్నీ సోల్డ్ అవుట్ అయిపోయాయి. ఈ రోజు (సెప్టెంబర్‌ 24) రాత్రి 10 గంటల నుంచి ప్రదర్శించే అన్నీ ఆటలు హౌస్‌ఫుల్. ఎమ్మెల్యే, ఎంపీ రికమెండేషన్లు కూడా నడవడం లేదు. ‘టికెట్ ముక్క లేదు. మా వల్ల కాదు’ అని చేతులు ఎత్తేస్తున్నారు బాక్స్‌ఆఫీస్ మేనేజర్లు. మిగతా ప్రాంతాల సంగతి ఏమో కానీ హైదరాబాద్‌లో మాత్రం వరల్డ్‌కప్ ఫైనల్ మ్యాచ్‌కి వచ్చినంత గిరాకీ వచ్చేసింది. టికెట్లు లేవు. అయిపోయాయి. ఇక బ్లాక్ మార్కెట్ గురించి చెప్పాల్సిన అవసరం లేదు. వెయ్యి రూపాయల టికెట్ మూడువేలకి పైగా అమ్మేశారు.
ఇంత హడావిడి జరిగిపోతున్న తరుణంలో తెలంగాణ హైకోర్టు ఓ ఆదేశం ఇచ్చింది. ప్రీమియర్‌లు ప్రదర్శించడంతో పాటు, టికెట్ ధరల పెంపునకు తెలంగాణ ప్రభుత్వం ఇచ్చిన అనుమతిని సస్పెండ్ చేసింది. ఈ మేరకు జస్టిస్‌ ఎన్వీ శ్రవణ్‌కుమార్ ఆదేశాలు జారీ చేశారు. హోంశాఖ ఉత్తర్వులను సవాల్ చేస్తూ మహేశ్‌ యాదవ్‌ అనే వ్యక్తి హైకోర్టులో పిటిషన్ దాఖలు చేశారు. వాదనలను విన్న హైకోర్టు న్యాయమూర్తి జస్టిస్‌ ఎన్వీ శ్రవణ్‌కుమార్ టికెట్ ధరల పెంపునకు అనుమతిస్తూ జారీ చేసిన మెమోను సస్పెండ్ చేశారు. తదుపరి విచారణ వచ్చే నెల 9వ తేదీకి వాయిదా వేశారు. మూడు రోజుల టికెట్లు ఇప్పటికే అడ్వాన్స్‌ బుకింగ్స్‌లో అమ్మేశారు థియేటర్స్ నిర్వాహకులు. ఇప్పుడు హైకోర్టు ఆదేశాలను ఎలా తీసుకోవాలో అర్థం కాని పరిస్థితి.
