ఒక్కోసారి అమెరికా కూడా గొప్ప జోకులు వేస్తుంటుంది. అటువంటిదే ఈ జోక్ కూడా. అమెరికా స్టేట్ డిపార్టమెంట్ అధికార ప్రతినిధి జాన్ కిర్బి మీడియా అడిగిన ఒక ప్రశ్నకు జవాబుగా “భారత్ పై దాడులకు పాల్పడుతున్న పాక్ ఉగ్రవాదులను పట్టుకొని వారిపై చర్యలు చేపట్టేందుకు భారత్ కి సహాయపడేందుకు అమెరికా సిద్దంగా ఉంది. ఈ విషయంలో భారత్ కి సహాయపడటం ఆదేశంతో మా స్నేహసంబంధాలకు నిదర్శనంగా నిలుస్తుంది,” అని చెప్పారు.
అమెరికాపై ఉగ్రవాదులు దాడులు జరిపితే అది ప్రపంచ శాంతికి భంగం కలిగినట్లు చెప్పుకొని ఆ ఉగ్రవాదులు వేరే ఏ దేశంలో దాగిఉన్నా ఆ దేశంలోకి జొరబడి వారిపై తన విమానాలతో బాంబుల వర్షం కురిపిస్తుంటుంది. అదే గత మూడు,నాలుగు దశాబ్దాలు పాక్ ఉగ్రవాదులు భారత్ పై దాడులు చేసి వేలాది మందిని బలిగొంటున్నా ఏనాడూ అమెరికా భారత్ పై సానుభూతి చూపలేదు. సహాయపడేందుకు ముందుకు రాలేదు. పైగా ఉగ్రవాద నిర్మూలన పేరుతో పాకిస్తాన్ కి ప్రతీ ఏటా వందల కోట్ల డాలర్లు కప్పంగా చెల్లిస్తోంది. పాక్ ప్రభుత్వం ఆ డబ్బు ఉగ్రవాద నిర్మూలనకే వినియోగించి ఉండి ఉంటే, ఆ దేశంలో ఏనాడో ఉగ్రవాదులు నాశనం అయ్యేవారు. కానీ నేటికీ మసూద్ అజ్హర్, లక్వీ, దావూద్ ఇబ్రహీం వంటి ఉగ్రవాదులు పాకిస్తాన్ ప్రభుత్వ రక్షణలోనే నిర్భయంగా తిరుగుతున్నారు.
పఠాన్ కోట్ దాడికి కుట్రపన్నిన మసూద్ అజ్హర్, మళ్ళీ భారత్ పై దాడులు చేస్తామని హెచ్చరిస్తుంటే, అతను నిర్దోషి అని పాక్ ప్రభుత్వం అతనిని వెనకేసుకు వస్తోంది. కనుక ఇప్పుడు అమెరికా అడిగినంత మాత్రాన్న పాక్ ప్రభుత్వం అతనిని భారత్ కి అప్పగించేస్తుందని అనుకోవడం అత్యాశే అవుతుంది. అలాగే పాకిస్తాన్, పాక్ ఆక్రమిత కాశ్మీర్ లో తిష్టవేసుకొని ఉన్న ఉగ్రవాదులను భారత్ మట్టుబెట్టడానికి ప్రయత్నిస్తే అమెరికా సహాయ పడుతుందని ఆశించడం అత్యాసే అవుతుంది.
తనకు లాభం లేనిదే అమెరికా ఏ పని చేయదు. కనుక పాక్ ఉగ్రవాదులను పట్టుకోవడానికి భారత్ కి సహకరించదలిస్తే దానికీ ఏదో బలమయిన కారణమే తప్పక ఉంటుంది. బహుశః భారత్ లో ఏదో పెద్ద ప్రాజెక్టు దక్కించుకోవడం కోసమే అమెరికా ఈ ఎర వేసి ఉండవచ్చును లేదా అమెరికా అధ్యక్ష ఎన్నికలను దృష్టిలో ఉంచుకొని అమెరికాలో స్థిరపడిన భారతీయులను ఆకట్టుకోవడానికి అయ్యుండవచ్చును.
