హీరోల మార్కెట్ పెంచుకునే క్రమంలో ఓ భాషలోని హీరో మరో భాషలో కూడా తమ సత్తా చాటాలనుకుంటున్నారు.. ముఖ్యంగా తెలుగు తమిళ పరిశ్రమల్లో ఈ తాకిడి ఎక్కువగా ఉంటుంది. మొన్నటిదాకా తమిళ హీరోలే తెలుగు బాక్సాఫీస్ మీదకు పోటీ రావడం జరిగేది.. అయితే ఇప్పుడు మన వాళ్లు కూడా కోలీవుడ్ మార్కెట్ పై కన్నేశారు. ఇప్పటికే తెలుగులో రిలీజ్ అయ్యే ప్రతి స్టార్ హీరో సినిమా తమిళ వర్షన్ కూడా రిలీజ్ చేసి హంగామా చేస్తున్నారు. బాహుబలి, శ్రీమంతుడు రీసెంట్ ఊపిరి కూడా అక్కడ హిట్ కొట్టాయి.
అయితే తమిళ తంబీలను ఆకర్షించే ప్రయత్నంలో మన హీరోలు మరో ముందడుగేసి వారి భాషలో డబ్బింగ్ కూడా చెప్పడం జరుగుతుంది. ఊపిరికి నాగ్ తమిళ డబ్ తానే చెప్పడం విశేషం. ఇప్పుడు సూపర్ స్టార్ మహేష్ కూడా తాను నటిస్తున్న బ్రహ్మోత్సవం సినిమా తమిళ్ లో కూడా రిలీజ్ అవుతుండటంతో తాను ఓన్ డబ్బింగ్ చెప్పేందుకు సిద్ధమయ్యాడని టాక్. ఇందుకు ముందు తమిళ వర్షన్ డైలాగ్స్ ను కూడా కంటస్తం చేస్తున్నాడట మహేష్. మరి ఇదో రకంగా మహేష్ తమిళ ప్రేక్షకులకు ఇస్తున్న గిఫ్ట్ అనే చెప్పాలి.
త్వరలో ఆడియో రిలీజ్ కార్యక్రమం జరుపుకునే బ్రహ్మోత్సవం సినిమాలో అందాల భామలు సమంత, కాజల్, ప్రణీత హీరోయిన్స్ గా నటిస్తున్నారు. శ్రీకాంత్ అడ్డాల డైరెక్ట్ చేస్తున్న ఈ సినిమాను పరం వి పొట్లూరి నిర్మిస్తుండగా మిక్కి జె మేయర్ సంగీతం అందిస్తున్నారు.
