ఈనెల 8న `యాత్ర` విడుద‌ల అవుతోంది. వై.ఎస్‌.ఆర్ చేసిన `పాద యాత్ర` ఆధారంగా తెర‌కెక్కించారు. వైఎస్ పాత్ర‌లో మ‌మ్ముట్టి న‌టించిన సంగ‌తి తెలిసిందే. మ‌మ్ముట్టి చాలా పెర్‌ఫెక్ష‌నిస్ట్‌. ఏ పాత్ర ఇచ్చినా… దానికి నూటికి నూరుపాళ్లూ న్యాయం చేసేంత వ‌ర‌కూ వ‌ద‌ల‌రు. వైఎస్ పాత్రకి మ‌మ్ముట్టి త‌ప్ప ఇంకెవ్వ‌రూ న్యాయం చేయ‌లేరేమో అని ప్ర‌చార చిత్రాలే చాటి చెబుతున్నాయి. వెండి తెర‌పై ఆయ‌న ఆ పాత్ర‌లో ఎంత‌గా ఒదిగిపోయారో చూడాలి.
మ‌రి వైఎస్ పాత్ర కోసం మ‌మ్ముట్టి చేసిందేమిటి? ఆయ‌న‌లా క‌నిపించ‌డానికి ఎలాంటి జాగ్ర‌త్త‌లు తీసుకున్నారు? – వీటిపై మ‌మ్ముట్టి మ‌న‌సు విప్పారు.
”వైఎస్ ఆర్ లా క‌నిపించ‌డం ఎవ‌రికీ సాధ్యం కాదు. అందుకే నేనూ ప్ర‌య‌త్నించ‌లేదు. కేవ‌లం ఆయ‌న‌లా చేయి ఊపానంతే. అలా ఎవ‌రు చేయి ఊపినా వైఎస్ లానే క‌నిపిస్తారు. ఆయ‌న గొంతుని కూడా మిమిక్రీ చేయ‌డానికి ప్ర‌య‌త్నించ‌లేదు. నాలా నేను మాట్లాడా. వైఎస్ ఆత్మ‌కి మాత్ర‌మే తీసుకున్నాం. ఉన్న‌ది ఉన్న‌ట్టుగా చెప్ప‌డానికి ప్ర‌య‌త్నించ‌లేదు కాబ‌ట్టి, మా ప‌ని కాస్త సుల‌భ‌మైంది” అని చెప్పుకొచ్చారు మ‌మ్ముట్టి. అయితే ఈ సినిమా చేయ‌క‌ముందు వై.ఎస్‌.ఆర్ గురించి ఆయ‌న‌కేమాత్రం తెలీద‌ట. ఈ సినిమా ఒప్పుకున్న‌ప్పుడే వైఎస్ ఆర్ గురించి తెలుసుకునే ప్ర‌య‌త్నం చేశార‌ని చెబుతున్నారు. అంతేకాదు.. వైఎస్ కుటుంబ స‌భ్యుల్నీ తాను క‌ల‌వ‌లేద‌ని క్లారిటీ ఇచ్చేశారు మ‌మ్ముట్టి.
