ప్రస్తుతం జై లవకుశ ప్రమోషన్స్ లో బిజీగా ఉన్న NTR పలు ఛానెళ్ళకు ఇంటర్వ్యూలు ఇస్తూ పలు ఆసక్తికర విషయాలు చెప్తున్నాడు. అలాగే టెంపర్, నాన్నకు ప్రేమతో, జనతా గ్యారేజ్ లాంటి హ్యాట్రిక్ హిట్స్ తో పాటు బిగ్ బాస్ షో సూపర్ హిట్టవడం తో మాంఛి ఫాం లో ఉన్నాడు ప్రస్తుతానికి. అలాగే త్రివిక్రం, కొరటాల లాంటి దర్శకుల సినిమాల తో లైనప్ కూడా పటిష్టంగానే కనిపిస్తోంది. సరిగ్గా ఇప్పుడే చాలా జాగ్రత్తగా ఆచితూచి అడుగులేస్తున్నాడు ఎన్ టీయార్.
సింహాద్రి సినిమా తర్వాత ఎన్ టీ యార్ కి ఆ స్థాయి హిట్ రావడానికి చాలా ఏళ్ళు పట్టింది. ఈ మధ్యలో సినిమాలు ఫ్లాపులు కావడం తో పాటు ఇతరత్రా కూడా కొన్ని ఇబ్బందులు ఎదుర్కొన్నాడు. వాటిలో ఒకటి – బాలకృష్ణ అభిమానులకి, ఎన్ టీయార్ అభిమానులకి మధ్య గ్యాప్ పెరగడం ఒకటి. కొడాలి నాని వైసిపి లో జాయినయి ఫ్లెక్సీల్లో సీనియర్ ఎన్ టీయార్ ఫోటోలు పెట్టినపుడు కొంత రగడ జరిగి బాలకృష్ణ మీడియాముఖంగా కొన్ని వ్యాఖ్యలు చేసిన విషయం తెలిసిందే. అలాగే సింహాద్రి సూపర్ హిట్టయ్యాక “అగ్ర స్థానమే నా లక్ష్యం” అంటూ ఇండియా టుడే కి ఇచ్చిన ఇంటర్వ్యూ మొదలుకుని ఆ తర్వాత జరిగిన పరిణామాల నేపథ్యం లో మెగా అభిమానులు కూడా ఎన్ టీయార్ కి కొంత దూరం అయ్యారు. అంతే కాక మధ్యలో బృందావనం లాంటివి ఒకట్రెండు సినిమాలు తీసినా, మొదటి నుంచీ మాస్ కథాంశాలు ఎన్నుకోవడం వల్ల మహిళా ప్రేక్షకులకి, ఫ్యామిలీ ఆడియెన్స్ కి కూడా అంత దగ్గర కాలేకపోయాడు.
అయితే ఇప్పుడు ఒక్కొక్క మైనస్ ని ఎన్ టీ యార్ జాగ్రత్తగా ప్లస్ గా మార్చుకుంటున్నట్టు కనిపిస్తోంది. ఇటీవలి జైలవకుశ ప్రమోషన్స్ లో భాగంగా ఇస్తున్న ఇంటర్వ్యూల్లో బాలకృష్ణ సినిమాల్లో తనకి నచ్చిన డైలాగులని చెప్పి ఇటు బాలయ్య అభిమానులని ఆకట్టుకుంటే, బన్నీ ని తన ఫేవరెట్ డ్యాన్సర్ గా చెప్పి అటు మెగా అభిమానులని కూల్ చేసాడు. ఇక ఏ మహిళా ప్రేక్షకులైతే ఎన్ టీయార్ కి అంత దగ్గర కాదనుకున్నారో ఇప్పుడు వాళ్ళే ఎన్ టీయార్ కి అత్యంత దగ్గరైపోయారు బిగ్ బాస్ షో ద్వారా.
చూస్తుంటే మళ్ళీ మునుపటి ప్రాభవాన్ని త్వరలోనే అందుకునేట్టున్నాడు ఎన్ టీయార్. మరి జై లవకుశ ఏం చేస్తుందో ఎన్ టీ యార్ ని!!!
