ముంబై 26/11 ప్రేలుళ్ళ సూత్రధారులలో ఒకడయిన అఫ్జల్ గురు మూడేళ్ళ క్రితం ఉరితీయబడ్డాడు. డిల్లీలోని జె.ఎన్.టి.యూనివర్సిటీలో కొందరు విద్యార్ధులు ఫిబ్రవరి 9న అతని మూడవ వర్ధంతిని కార్యక్రమాన్ని నిర్వహించారు. భారత్ పై దాడికి పాల్పడి, అనేకమంది ప్రాణాలు పోవడానికి కారకుడయిన ఒక ఉగ్రవాదికి దేశ రాజధాని డిల్లీలోనే కొందరు విద్యార్ధులు వర్ధంతి కార్యక్రమాన్ని నిర్వహించి నివాళులు అర్పించడాన్ని ఎవరూ జీర్ణించుకోలేరు. కేంద్ర హోం మంత్రి రాజ్ నాద్ సింగ్ దీనిపై తీవ్ర ఆగ్రహం వ్యక్తం చేసి, ఈ కార్యక్రమంలో పాల్గొన్న విద్యార్ధులపై కేసులు నమోదు చేయమని ఆదేశాలు జారీ చేసారు. ఈ విషయాన్ని ఆయనే స్వయంగా నిన్న దృవీకరించారు. “జె.ఎన్.టి.యూనివర్సిటీలో జరిగిన కార్యక్రమానికి లష్కర్ ఉగ్రవాది హఫీజ్ సయీద్ మద్దతు ఉంది. ఆతని ప్రోద్బలంతోనే ఈ కార్యక్రమం నిర్వహించబడినట్లు మావద్ద ఆధారాలున్నాయి. విద్యార్ధులే ఇటువంటి కార్యక్రమాలలో పాల్గొనడం చాలా దురదృష్టకరం. హఫీజ్ సయీద్ మద్దతుతో ఈ కార్యక్రమం నిర్వహించిన విద్యార్ధులపై కేసులు నమోదు చేసి చట్ట ప్రకారం చర్యలు తీసుకోమని నేను ఆదేశాలు జారీ చేసాను. దీనితో సంబంధంలేని విద్యార్ధుల జోలికి వెళ్ళవద్దని అధికారులను గట్టిగా హెచ్చరించాను. దేశ ప్రజలందరూ దేశ వ్యతిరేక కార్యక్రమాలను ముక్త కంఠంతో వ్యతిరేకించాలి,” అని అన్నారు.
ఈ కార్యక్రమాన్ని నిర్వహించిన కన్నయ్య కుమార్ తో బాటు కొందరు విద్యార్ధులను శుక్రవారం పోలీసులు అరెస్ట్ చేసి వారిపై కేసులు నమోదు చేసారు. వామపక్షాల నేతలు కొందరు హోం మంత్రి రాజ్ నాద్ సింగ్ ని కలిసి విద్యార్ధులను విడిచిపెట్టాలని కోరగా అందుకు ఆయన నిరాకరించారు. దేశ వ్యతిరేక కార్యక్రమాలలో పాల్గొన్న వారిని వెనకేసుకొని రావద్దని వారికి హితవు పలికారు. ఆ విద్యార్ధుల సంగతి న్యాయస్థానాలు చూసుకొంటాయని, ఈ వ్యవహారంలో ఇక తను జోక్యం చేసుకొన్ని తేల్చి చెప్పారు. కాంగ్రెస్, దాని మిత్రపక్షాలు, వామ పక్షాలు విద్యార్ధులను అరెస్ట్ చేయడాన్ని తీవ్రంగా నిరసిస్తున్నాయి.
కాంగ్రెస్ పార్టీ ఉపాధ్యక్షుడు రాహుల్ గాంధి జె.ఎన్.టి.యూనివర్సిటీకి వెళ్లి విద్యార్ధులకు సంఘీభావం తెలపడాన్ని రాజ్ నాద్ సింగ్ తప్పు పట్టారు. “దేశ వ్యతిరేక కార్యక్రమాలకు పాల్పడుతున్నవారికి రాహుల్ గాంధి సంఘీభావం తెలుపుతున్నారు కనుక కాంగ్రెస్ పార్టీ కార్యాలయంలో ఉగ్రవాదుల విగ్రహాలు ఆవిష్కరించుకొంటే బాగుంటుందేమో?” అని ఎద్దేవా చేసారు. దేశ వ్యతిరేక చర్యలను గట్టిగా ఖండించకపోగా దానిని కూడా రాజకీయం చేయాలని ప్రయత్నించడం చాలా దురదృష్టకరమని రాజ్ నాద్ సింగ్ అన్నారు.
