మంచు విష్ణు ప్ర‌తిష్టాత్మ‌కంగా తెర‌కెక్కిస్తున్న చిత్రం ‘క‌న్న‌ప్ప’. ఈ సినిమాలో సౌత్ ఇండియ‌న్ స్టార్ల‌తో పాటు, బాలీవుడ్ స్టార్లు కూడా అతిథి పాత్ర‌ల్లో మెర‌వ‌బోతున్నారు. అక్ష‌య్‌కుమార్ శివుడి పాత్ర పోషిస్తున్న సంగ‌తి తెలిసిందే. ఆయన షూటింగ్ పార్ట్ కూడా పూర్త‌య్యింది. ఇప్పుడు ప్ర‌భాస్ వంతు వ‌చ్చింది. ‘క‌న్న‌ప్ప’లో ప్ర‌భాస్ నందీశ్వ‌రుడిగా న‌టించ‌బోతున్నాడ‌ని తెలుగు 360 ముందే చెప్పింది. ఇప్పుడు ప్ర‌భాస్ ‘క‌న్న‌ప్ప’ సెట్లో కూడా అడుగు పెట్టారు. ఈనెల 7 నుంచి రామోజీ ఫిల్మ్ సిటీలో ప్ర‌భాస్ పై కీలక సన్నివేశాలు తెర‌కెక్కిస్తున్నారు. మ‌రో నాలుగు రోజులు ఈ షూటింగ్ కొన‌సాగే అవ‌కాశం ఉంది. దాంతో… ‘క‌న్న‌ప్ప’ దాదాపుగా పూర్త‌వుతుంది. ఈ సినిమాలో విజువ‌ల్ ఎఫెక్ట్స్‌కి ఎక్కువ ప్రాధాన్యం ఉంది. పోస్ట్ ప్రొడ‌క్ష‌న్ కోసం ఎక్కువ రోజులు సమయం కేటాయించారు. ‘క‌న్న‌ప్ప’ షెడ్యూల్ పూర్త‌యిన త‌ర‌వాత ప్ర‌భాస్ ‘రాజాసాబ్‌’కు డేట్లు కేటాయిస్తారు. ‘రాజాసాబ్‌’ షెడ్యూల్ అయిన వెంట‌నే ప్ర‌భాస్ ఇట‌లీ వెళ్తారు. అక్క‌డే ఆయన వేస‌వి విడిది. అక్క‌డ్నుంచి తిరిగి వ‌చ్చాక ‘రాజాసాబ్‌’ తో పాటుగా ‘స‌లార్ 2’ సెట్లో పాలు పంచుకోనున్నారు.
‘క‌న్న‌ప్ప’ సెట్లో బాహుబ‌లి
