యూవీ క్రియేషన్స్ సినిమా అంటే ఓ విధంగా ప్రభాస్ సినిమానే అనుకోవాలి. ఎందుకంటే… యూవీ సంస్థ‌కూ ప్ర‌భాస్‌కీ అంత అవినాభావ సంబంధం ఉంది. యూవీకి ప్రభాస్ అన‌ధికార నిర్మాత. ఆ సంస్థ నుంచి వ‌చ్చిన ప్ర‌తీ సినిమాకీ ప్ర‌త్య‌క్షంగానూ, ప‌రోక్షంగానూ త‌న స‌హాయం అందిస్తుంటాడు ప్రభాస్. ‘భాగ‌మ‌తి’ విష‌యంలో ప్ర‌భాస్‌దే కీల‌క పాత్ర అన్న‌ది టాలీవుడ్ జ‌నాల న‌మ్మ‌కం. ఈ ప్రాజెక్టు సెట్ కావ‌డానికి, అనుష్క టీమ్‌లోకి రావ‌డానికి ప్రభాస్ కాస్త చొర‌వ చూపించాడ‌ని తెలుస్తోంది. ఇప్పుడు ‘భాగ‌మ‌తి’ విడుద‌ల‌కు సిద్ధ‌మైంది. ఈ సినిమా ప్ర‌మోష‌న్ల‌లో ప్రభాస్ పాల్గొంటాడ‌ని విస్ర్కృతంగా ప్ర‌చారం జ‌రుగుతోంది. అయితే.. ప్రభాస్ మాత్రం ‘భాగ‌మ‌తి’కి దూరంగా ఉండాల‌ని డిసైడ్ అయిన‌ట్టు తెలుస్తోంది. `భాగ‌మ‌తి` ప్రీ రిలీజ్ వేడుక ప్ర‌స్తుతం హైదారాబాద్ లో జ‌రుగుతోంది. దీనికి ప్రభాస్ అతిథిగా వ‌స్తాడ‌ని గ‌ట్టిగా ప్ర‌చారం జ‌రిగింది. అయితే.. ప్రభాస్ మాత్రం డుమ్మా కొట్టేశాడు. దీనికే కాదు.. ‘భాగ‌మ‌తి’కి సంబంధించిన ఓ ఈవెంట్ లోనూ పాలుపంచుకోకూడ‌ద‌ని డిసైడ్ అయ్యాడ‌ట. ప్రభాస్ – అనుష్క‌ల‌తో ఓ వీడియో ఇంట‌ర్వ్యూ చేసి వ‌ద‌లాల‌న్న‌ది యూవీ క్రియేషన్స్ ఆలోచ‌న. దానికి కూడా ప్రభాస్ సున్నితంగా నో చెప్పాడ‌ని తెలుస్తోంది. ‘భాగ‌మ‌తి’ ప్ర‌మోష‌న్ల‌కు ప్ర‌భాస్‌దూరంగా ఉండ‌డానికి ప్ర‌త్యేక‌మైన కార‌ణాలున్నాయా? లేదంటే ‘సాహో’ ఒత్తిడిలో బిజీగా ఉన్నాడా? అనే ఆస‌క్తి నెల‌కొందిప్పుడు.
