రాబిన్ వుడ్, స్కంధ, జూనియ‌ర్‌, ఎక్స్ ట్రా.. ఇలా ఒక‌దాని మీద మ‌రో ఫ్లాప్ వ‌చ్చి ప‌డిపోయాయి శ్రీ‌లీల‌కు. దాంతో ఆమెని ఐరెన్ లెగ్ గా చూడ‌డం మొద‌లెట్టారు. ఒక్క‌సారిగా శ్రీలీల క్యాలిబ‌ర్ మీద అనుమానాలు వ‌చ్చి ప‌డిపోయాయి. డాన్సింగ్ టాలెంట్ మీదే శ్రీలీల నెట్టుకు వ‌స్తోంద‌ని, మ‌రో ఆప్ష‌న్ లేక, శ్రీ‌లీల‌ని ఎంచుకొంటున్నారు త‌ప్ప, శ్రీలీల వ‌ల్ల సినిమాల‌కు ఒరిగిందేం లేద‌న్న కామెంట్లు గ‌ట్టిగానే వినిపిస్తున్నాయి. ఈనేప‌థ్యంలో ఓ హిట్టు త‌న ఖాతాలో వేసుకోవాల్సిన అవ‌స‌రం ఏర్ప‌డింది. ఈ నేప‌థ్యంలో శ్రీలీల నుంచి వ‌స్తున్న మ‌రో సినిమా ‘మాస్ జాత‌ర’ ఫ‌లితం శ్రీలీల కెరీర్‌ని డిసైడ్ చేస్తుంద‌న‌డంలో ఎలాంటి సందేహం లేదు.
ర‌వితేజ క‌థానాయ‌కుడిగా న‌టించిన సినిమా ఇది `ధ‌మాకా` త‌ర‌వాత వీరిద్ద‌రి కాంబోలో వ‌స్తున్న ప్రాజెక్ట్ ఇదే. కాబ‌ట్టి ఆ సెంటిమెంట్ గ‌ట్టిగా వ‌ర్క‌వుట్ అయ్యే అవ‌కాశం ఉంది. శ్రీలీల ఈ సినిమాలో ఓ ప‌ల్లెటూరు అమ్మాయిగా క‌నిపించ‌బోతోంది. తొలిసారి శ్రీ‌కాకుళం యాస‌లో మాట్లాడ‌బోతోంది. అంకోసం గ‌ట్టిగా ప్రాక్టీస్ కూడా చేసింద‌ట. ఈ పాత్ర, అందులోని తాను ప‌లికే డైలాగులు, ఆ యాస.. త‌ప్ప‌కుండా ప్రేక్ష‌కుల‌కు న‌చ్చుతాయ‌ని భ‌రోసాగా చెబుతోంది శ్రీలీల. త‌న‌పై ప‌డిన ఐరెన్ లెగ్ ముద్ర చెరిపేయాలంటే ఈ సినిమాతో హిట్టు కొట్ట‌డం త‌ప్ప‌ని స‌రి అనే సంగతి శ్రీ‌లీల‌కు కూడా బాగా తెలుసు. అందుకే ‘మాస్ జాత‌ర’పై ఎక్కువ‌గా ఫోక‌స్ చేసింది. ఇది వ‌ర‌క‌టితో పోలిస్తే ఈ సినిమా ప్ర‌మోష‌న్ల‌లో కూడా కొంచెం ఎగ్ర‌సీవ్ గా పాల్గొంటోంది. ”నా కెరీర్‌లో పెద్ద‌గా ప్ర‌యోగాలు చేసే అవ‌కాశం నాకు రాలేదు. ఎక్కువ‌గా క‌మ‌ర్షియ‌ల్ సినిమాల్లోనే న‌టించాను. ఇప్ప‌టికీ ఆ జోన‌ర్ అంటేనే నాకు ఇష్టం. స‌డ‌న్ గా నా కెరీర్ గ్రాఫ్ మార్చుకోవాల‌ని, ప్ర‌యోగాలు చేయాల‌ని నాకు లేదు. నాకు కంఫ‌ర్ట్ ఉన్నంత కాలం ఈ త‌ర‌హా రోల్స్ చేస్తూనే ఉంటా. మాస్ జాత‌ర‌లో నేను కొత్త‌గా క‌నిపిస్తాన‌నే న‌మ్మ‌కం ఉంది. ఈ త‌ర‌హా పాత్ర ఇంత వ‌ర‌కూ చేయ‌లేదు” అని న‌మ్మ‌కంగా చెబుతోంది శ్రీలీల.
‘ఉస్తాద్ భ‌గ‌త్ సింగ్’ లోనూ శ్రీలీల న‌టిస్తున్న సంగతి తెలిసిందే. త‌న చేతిలో ఉన్న మ‌రో పెద్ద సినిమా ఇది. ప‌వ‌న్ ప‌క్క‌న న‌టించ‌డం ఇదే తొలిసారి. ఉస్తాద్ త‌న కెరీర్‌కి బిగ్గెస్ట్ ప్ల‌స్ పాయింట్ అవుతోంద‌న్న భ‌రోసా శ్రీలీల మాట‌ల్లో క‌నిపిస్తోంది.
