సూర్యకు తెలుగులో ఓ సినిమా చేయాలని ఎప్పటి నుంచో ఆశ. కాకపోతే సరైన కథ సెట్ అవ్వడం లేదు. ఆమధ్య త్రివిక్రమ్ – సూర్య ఇద్దరూ కలసి చేస్తారని వార్తలొచ్చాయి. సూర్య కూడా ఈ విషయాన్ని ఒప్పుకున్నాడు. అయితే త్రివిక్రమ్ తన సినిమాలతో తాను బిజీ అయిపోయాడు. సూర్య కూడా తమిళ ఇండ్రస్ట్రీని వదిలి రాలేకపోతున్నాడు. మరి వీరిద్దరి మధ్య సినిమా ఎప్పుడు ఉంటుంది? అసలు వస్తుందా? రాదా? ఈ విషయమై సూర్య స్పందించాడు.
”మా ఇద్దరి మధ్య పలుదఫాలు చర్చలు జరిగాయి. ఇప్పటికీ నడుస్తూనే ఉన్నాయి. ఆయనతో కలసి పనిచేయడానికి నేను కూడా ఆసక్తిగా ఎదురుచూస్తున్నా” అంటున్నాడు. అంటే.. త్రివిక్రమ్ చెప్పిన కథ… సూర్యకు ఇంకా నచ్చట్లేదన్నమాట. మరి సూర్యకు నచ్చే కథ త్రివిక్రమ్ ఎప్పుడు చెబుతాడో?? అయితే తెలుగులో సినిమాలు చేయలేకపోతున్నానన్న బాధ మాత్రం సూర్యకు లేదు. ఈ విషయాన్ని తనే ఒప్పుకున్నాడు కూడా. ”నేను చేసే సినిమాలన్నీ రెండు భాషల్లోనూ విడుదల అవుతున్నాయి. ఓ ద్విభాషా చిత్రానికీ, తెలుగులో నెచురల్ గా నటించే చిత్రానికి ఉన్న తేడా ఏమిటో నాకు అర్థం కావడం లేదు. బహుశా… డబ్బింగ్ సినిమాఅనేసరికి లిప్ సింక్ సరిగా కుదరకపోవొచ్చు. అది తప్ప… వేరే అడ్డంకులేం ఉండవు” అని సమర్థించుకుంటున్నాడు.