బిచ్చగాడు తరవాత విజయ్ ఆంటోనీ సినిమాపై ఆశలు, అంచనాలు పెరిగిపోయాయి. అందుకే భేతాళుడు సినిమాపై దృష్టి పెట్టింది తెలుగు చిత్రసీమ. బిచ్చగాడు రైట్స్ రూ.40 లక్షలకు కొంటే భేతాళుడు కోసం మాత్రం దాదాపు రెండు కోట్లు వెచ్చించారు నిర్మాతలు. అందులో విజయ్ ఆంటోనీ వాటా కూడా ఉంది. అయితే…. బిచ్చగాడు స్థాయిలో భేతాళుడుకి ఆదరణ దక్కడం లేదు. ఓపెనింగ్స్ బాగానే వచ్చినా… దాన్ని నిలబెట్టుకోలేదు. ఈ సినిమాతో తెలుగు నిర్మాతలకు నష్టాలు తప్పవనుకొన్నారంతా. అయితే… భేతాళుడునీ, ఈ సినిమా కొన్న నిర్మాతల్నీ జీ తెలుగు ఆదుకొంది. రూ.1.3 కోట్లకు ఈ సినిమా శాటిలైట్ రైట్స్ ని జీ తెలుగు కైవసం చేసుకొంది. దాంతో.. భేతాళుడు నిర్మాతలు ఒడ్డునపడినట్టైంది.
ఈ సినిమా విడుదలకు ముందే.. రైట్స్ని జీ తెలుగుకి కట్టబెట్టేశారు నిర్మాతలు. అందుకే… నష్టాల నుంచి తప్పించుకొనే ఛాన్స్ దక్కింది. బిచ్చగాడు సినిమాకి టీవీలో మంచి రేటింగే వచ్చింది. భేతాళుడు మరీ అంత బ్యాడ్ మూవీ కాకపోవడం, విజయ్ ఆంటోనీకి క్రేజ్ ఉండడంతో… జీ తెలుగు కూడా మంచి రేటుకే భేతాళుడిని దక్కించుకొన్నట్టైంది. ఈమధ్య స్ట్రయిట్ సినిమాల్నీ, స్టార్ హీరోల సినిమాల్నీ కొనడానికి టీవీ ఛానళ్లు జంకుతున్నాయి. అలాంటిది విజయ్ సినిమానీ, అదీ ఓ డబ్బింగ్ సినిమానీ విడుదలకు ముందే కొనేయడం విశేషమే.