తెలంగాణా ప్రభుత్వం ఒకేసారి రెండు పూర్తి భిన్నమయిన అనుభవాలను ఎదుర్కొంది. ప్రధాని నరేంద్ర మోడి నుంచి ప్రశంశలు అందుకొన్న సమయంలోనే కాగ్ నుంచి అక్షింతలు కూడా పడ్డాయి. రాష్ట్రంలో పరిశ్రమలు నెలకొల్పడానికి అనువయిన వాతావరణం సృష్టించినందుకు ప్రధాని నరేంద్ర మోడి తెలంగాణా ప్రభుత్వాన్ని ప్రశంసిస్తే, నీటి పారుదల శాఖలో పద్దులను ఒక పద్ధతి ప్రకారం నిర్వహించనందుకు కంప్ట్రోలర్ ఆఫ్ అక్కౌంట్స్ (కాగ్) అక్షింతలు వేసింది. నీతిపారుదల పనులకు కేంద్ర, రాష్ట్ర ప్రభుత్వాలు వివిద పధకాల పేరిట నిధులు కేటాయిస్తుంటాయి. అలాగే దేశ, విదేశాలలోని ఆర్ధిక సంస్థల నుంచి అప్పుల రూపంలో నిధులు వస్తుంటాయి. వాటన్నిటికీ దేనికది వేర్వేరుగా పద్ధులు నిర్వహించాల్సి ఉంటుంది. కానీ నీటి పారుదల పనులను చాలా ప్రతిష్టాత్మకంగా చేపట్టి శరవేగంగా చేయాలనే ఉద్దేశ్యంతో తెలంగాణా ప్రభుత్వం అన్ని రకాల నిధులకు కలిపి ఒకే ఖాతా నిర్వహిస్తోంది. తద్వారా పనులకు నిధుల విడుదలలో ఆలస్యం జరగకుండా నివారించవచ్చని ప్రభుత్వ ఉద్దేశ్యం కావచ్చును. కానీ ఆ విధంగా రకరకాల పధకాలు, మార్గాల ద్వారా సీకరించుతున్న భారీ నిదులనన్నిటినీ ఒక్క చోటికి చేర్చినట్లయితే భారీ స్థాయిలో అవినీతి జరిగే అవకాశం కూడా ఉంటుంది కనుక తెలంగాణా ప్రభుత్వం అనుసరిస్తున్న ఆ విధానాన్ని కాగ్ తప్పు పట్టింది. నిధులను ఆ శాఖకు చెందినా అధికారులు ఖర్చు చేసే విషయంలో ప్రభుత్వం ఇచ్చిన ఆదేశాలు కూడా చాలా గందరగోళంగా ఉన్నట్లు కాగ్ తేల్చి చెప్పింది. మిగిలిన అన్ని శాఖలు తమకు అందిన నిధుల కోసం ఏవిధంగా వేర్వేరుగా ఖాతాలను ఉపయోగిస్తున్నాయో, నీటి పారుదల శాఖ కూడా అదే విధానం అనుసరించాలని సూచించింది. దానితో తెలంగాణా ప్రభుత్వం మళ్ళీ పాత విధానంలోనే పద్దులను నిర్వహించాలని నిర్ణయించింది.
