ఆంధ్రప్రదేశ్‌లో నిబంధనలకు విరుద్ధంగా నిర్మించిన భవనాల క్రమబద్ధీకరణ పథకం దరఖాస్తుల గడువు ముగియడంతో పట్టణ ప్రణాళిక అధికారులు తమ తనిఖీలను ముమ్మరం చేశారు. విజయవాడ, విశాఖపట్నం, తిరుపతి, గుంటూరు వంటి ప్రధాన నగరాల నుండి దాదాపు 74,000 కు పైగా దరఖాస్తులు అధికారులకు అందాయి. గడువు ముగిసింది. దీంతో క్షేత్రస్థాయిలో వాస్తవ పరిస్థితులను అంచనా వేసేందుకు టౌన్ ప్లానింగ్ బృందాలు రంగంలోకి దిగాయి.

ప్రభుత్వం అధికారికంగా బీపీఎస్ ప్రకటన విడుదల చేసిన తర్వాత కూడా పలువురు యజమానులు నిబంధనలకు విరుద్ధంగా అదనపు అంతస్తులను నిర్మించినట్లు అధికారులు ప్రాథమికంగా గుర్తించారు.

అనుమతించిన ప్లాన్ల కంటే అదనంగా వేసిన ఈ అంతస్తులపై ప్రభుత్వం తీవ్ర ఆగ్రహం వ్యక్తం చేస్తోంది. కేవలం పాత నిర్మాణాల క్రమబద్ధీకరణ కోసమే ఈ పథకాన్ని ప్రవేశపెట్టగా, దీనిని ఆసరాగా చేసుకుని కొత్తగా అక్రమాలకు పాల్పడిన వారిపై కఠిన చర్యలు ఉంటాయని ఉన్నతాధికారులు హెచ్చరిస్తున్నారు. ప్రస్తుతం అందిన దరఖాస్తులను పరిశీలించే ప్రక్రియ వేగవంతమైంది. ప్రతి దరఖాస్తును క్షుణ్ణంగా పరిశీలించి, డ్రోన్ సర్వేలు , క్షేత్రస్థాయి తనిఖీల ద్వారా భవన నిర్మాణాల కాలక్రమాన్ని అధికారులు సరిపోల్చుతున్నారు. నిబంధనల ప్రకారం అర్హత ఉన్న వాటికే క్రమబద్ధీకరణ అనుమతులు ఇస్తామని, కట్-ఆఫ్ తేదీ తర్వాత నిర్మించిన అక్రమ కట్టడాలను ఎట్టి పరిస్థితుల్లోనూ సహించేది లేదని స్పష్టం చేస్తున్నారు.

బీపీఎస్ గడువు ముగిసినందున, ఇకపై తనిఖీల్లో దొరికే అనధికారిక కట్టడాలు , అదనపు అంతస్తుల విషయంలో మున్సిపల్ చట్టాల ప్రకారం కఠినమైన చర్యలు తీసుకోనున్నారు. నిబంధనలు ఉల్లంఘించిన భవనాలకు నోటీసులు జారీ చేయడం, భారీ జరిమానాలు విధించడంతో పాటు అవసరమైతే అక్రమ అంతస్తులను కూల్చివేయడానికి కూడా వెనుకాడబోమని పట్టణ ప్రణాళిక విభాగాలు స్పష్టం చేస్తున్నాయి.